Steps in Life

成長

2011-08-16T22:32:00.000-07:00

爸第一次帶軒去新泳會學游泳, 看得出他很努力。

練習是在下午五時至六時, 之前還有其他的興趣班, 理應他是很累的, 但他沒有放棄, 不行的時候, 深呼吸一口, 便再埋首練習, 不像以前坐在池邊扭計。

危機處理

2011-07-22T22:31:00.000-07:00

媽媽今早腰痛, 坐在椅子上休息, 軒很細心地照顧媽媽, 又自己在房溫習、看書, 不騷擾媽媽。

但突然間, 媽媽痛得不能動, 叫軒幫忙叫救護車, 這一刻軒知道嚴重, 便大喊出來, 但仍然拿着電話打「999」!

正當軒思考應怎樣向報案中心說時, 姨媽便到了幫忙。

這時才知道軒的危機處理很好。

秆學班

2011-07-19T22:30:00.000-07:00

軒的暑期課程, 這一個可能是比較好玩的, 今天他就做了這個「光學發電器」回來, 還興高彩列的示範呢!

玫瑰經

2011-07-14T19:59:00.000-07:00

軒每天睡前都會祈禱, 不過今天很特別, 他說他想唸玫瑰經!

小手術

2011-07-09T19:59:00.000-07:00

軒做了個小手術, 初初說不怕, 就算剛完成也說不痛, 但當麻醉藥一過, 便開始痛呢!

但都好努力去忍耐, 值得鼓勵。

晚上因為痛而睡不著, 爸爸在床邊陪他。但明明自己還痛得哭起來, 還邊抹眼淚、邊叫爸爸:「你返去瞓啦, 我得啦。」

真有心。

不需提點

2011-07-03T19:57:00.000-07:00

晚上, 爸跟軒完成在書城買的變形金剛砌圖。

其實一開始爸己沒打算幫手, 等他可以自己完成, 只是在旁邊提點。

最初爸叫他先砌在旁邊的BumbleBee, 還找了好幾塊給他開始, 但當要自己再找的時侯, 他拿起一塊便很快知道該放那裡, 就這樣這邊一塊、那邊一塊, 很快便自己完成了整幅砌圖。爸爸跟本不需要提點呢!

海棉寶寶

2011-07-01T19:56:00.000-07:00

趁着回歸假期, 帶軒去深圳少年宮書城。

書城看書十分舒服, 可惜大部份都是簡體字。

軒跟上次去舊書城一樣, 買了二本海棉寶寶的圖畫故事書。

皮紋測試

2011-06-26T19:55:00.000-07:00

帶了軒去做「皮紋測試」, 結果出乎意料, 說軒是右腦發度好過左腦!

獎狀

2011-06-20T19:54:00.000-07:00

學校原來有好多獎狀, 今日軒拿了張「閱讀如此多Fun」的獎狀回來, 獎勵他多看課外書。

軒說他的好朋友也有上台領獎, 媽問:「係咪都係多Fun呀?」

軒答:「唔係, 係鬥飲好立克呀!

自助借書機

2011-06-12T19:54:00.000-07:00

近期軒很喜歡到圖書館借書, 所以今天教他用自助借書機。

現在, 軒己懂得使用圖書館的基本設施(包括網上續借)了。

翻譯

2011-06-05T19:52:00.000-07:00

晚飯時, 軒問媽:「我想飲杯珍多冰, 得唔得?」

媽話:「你問準爸爸先啦。」

軒:「爸爸, 飲唔飲珍多冰呀?」

爸答:「我病緊唔飲得, 你問我都無用!」

軒聞言, 即刻對媽媽話:「爸爸話無所謂喎!」

七星級酒店

2011-05-30T19:52:00.000-07:00

今天, 軒的「七星級酒店」的床, 進化成「七星級酒店」的房, 還有匙咭呢!

七星酒店的床

2011-05-29T19:51:00.000-07:00

換了一張新床給軒, 他極度喜歡, 留在床上看書。

爸媽在廳裡, 五分鐘後軒從房裡跑出來, 叫媽媽入去看他的床, 說:「去睇吓我七星酒店的床。」

媽一看, 不得了, 軒把床收拾得前所未有的整齊, 還把拖鞋放好呢!

愛因斯坦展

2011-05-10T19:50:00.000-07:00

趁着假期, 帶軒去看愛因斯坦展。

原以為不會有太多人, 怎料十分擠擁。

目標

2011-05-07T19:49:00.000-07:00

媽跟軒在整理東西, 看見軒在低班時的第一名獎杯。

媽於是問軒:「你第一年讀幼稚園就考第一, 咁你讀小學有什麼目標?」

軒答:「考五次第一!」

媽假作不明:「小學有六年喎, 點解唔係考六次第一呀?」

軒答:「今年都考唔到第一啦。」心水又幾清喎。

但媽仍然鼓勵他:「上次你同第一名平均分差唔到半分, 你努力些都可以做到的。」

Baby Detective

2011-05-02T19:48:00.000-07:00

入東涌探完爺爺嫲嫲, 搭車入機場行街, 見到有個叫"Baby Detective"的節目, 於是幫軒報名。

節目其實係有二個外籍人士扮私家偵探, 叫小朋友一齊幫手查案。外籍人士當然講英文, 難得軒又有問有答, 樂在其中。

控球練習

2011-05-01T19:47:00.000-07:00

有了棍便身痕, 成日拿棍練習控球(有一個專用的球)。

因為軒昨晚好有心機完成作業, 媽帶他到公園練習, 玩得好開心。

冰球棍

2011-04-27T19:46:00.000-07:00

講了很久, 今日終於買了支冰球棍給軒。

紙摺扇

2011-04-25T19:45:00.000-07:00

外出郊遊, 天氣很熱, 買了把傳統的紙摺扇給軒。

當然, 他還未用過, 所以連向那個方向開都不知道。因此當他看見姨長單手就把扇給開了, 感覺很神奇。

爸爸教了他方法之後, 他便不停的練習, 不用半天, 己可以做到了。

喊

2011-04-24T19:44:00.000-07:00

軒有個習慣, 就是不喊出來給人見到, 每次想喊, 他都會先深呼吸, 然後用手抹眼、額頭, 一方面在眼淚流出來前抹走, 另一方面假裝抹汗(其實一定會有汗的), 跟住便會拿紙巾抹眼及鼻。

唯一會令他大喊的便是給爸爸「喝」, 爸爸一「喝」, 他便好像小朋友一樣, 面容扭曲、跟著便「哇」地大聲喊!

媽媽話因為平時爸爸跟他玩多, 一惡起來便和平時的形象出入很大, 所以特別驚。

睇電視

2011-04-12T19:42:00.000-07:00

平時好少比軒睇電視, 只是間中睇下卡通片, 可能真係好想睇, 近日都不用鬧鐘, 7點鐘就自己起身開電視!

花卉比賽

2011-04-07T22:46:00.000-07:00

學校每人派了一盆花, 要求小朋友好好栽種, 之後交還給學校看誰種得最好。

軒拿到的花叫「一品紅」，長滿了紅紅的、一串串的花，很漂亮。

可惜幾日後便開始謝了，軒拿去問花店姨姨，她說此花需要陽光，越猛花開得越盛，難怪花謝了。但她安慰軒說，當花習慣環境後，便會從新長花。

軒聽後才放心一點。

"亞伯"款

2011-03-12T22:44:00.000-08:00

軒有個習慣將條褲有咁高「丘」咁高, 可以去到心口, 成個亞伯款!

生日快樂

2011-03-03T22:58:00.000-08:00

7歲了, 因為要返學的關係, 只邀請了姨長一家人食飯、切蛋糕!

自我評價

2011-02-28T22:57:00.000-08:00

學校有本叫"I can"的功課, 是每個月去訂立下一個月的目標, 到下個月檢討有多少達標, 再訂下次的目標。

裡面要求訂立的目標有很多不同的範疇, 其實是叫小朋友學習去定目標、去實行, 而每次都會是小朋友自己去決定有無達標。

軒每一次都會好誠實地給自己打分, 不會得過且過、或者盲目地給自己高分。

他這樣誠實, 令爸媽很欣慰。

地膽

2011-02-05T20:17:00.000-08:00

軒因為在屋企樓下等校車的時候四處跑, 甚至跑入別人公司, 因而結識很多叔叔姨姨。

這幾天經過, 軒如常地跟他們打招呼, 亦如常地叫完便繼續向前行, 想不到叔叔姨姨們不約而同追出來紿軒利是!

真的是多謝。

其實軒初初並不是這麼熱情的，只是給媽薰陶下，跟叔叔姨姨熟絡了，才變得大膽起來。現在每次經過，總會大聲地打招呼呢。

退任班長

2011-01-19T22:55:00.000-08:00

這是下學期的開始, 班主任決定邀請另外的同學接任班長的職務。

對於退任, 軒有點不習慣, 仍然說這個班長什麼、那個班長什麼, 甚至自製一本「責名簿」!

媽唯有教他接受改變。

撕PLE

2011-01-18T22:55:00.000-08:00

今日不知什麼原故, 軒十分不專心做功課, 又不聽話, 令到媽媽好嬲, 一氣之下將本PLE功課撕爛了。

軒從未見過媽媽這麼忿怒, 即時收聲、好驚的望住媽媽!

最後軒在一本「爛溶溶」的功課上完成工作。

缺席考試

2011-01-13T01:12:00.000-08:00

軒半夜開始發燒, 整個人都無精神, 所以今日... 無返學、無考試!

考天才

2011-01-12T01:10:00.000-08:00

今日放學返來, 軒又叫好累, 幸好無再話頭痛。

因為明天要考英文, 食過飯後便開始温習。但不多久便沒有精神, 媽怕他身體弱容易病, 便着他上床休息。

繼中文科後, 英文科也要「考天才」!

頭痛

2011-01-11T01:09:00.000-08:00

明天開始考試, 但軒一下校車便跟媽媽說:「我好頭痛。」

接着便跑上床瞓。

媽趁他換衫的時候問:「今日做過什麽呀?」

軒:「無呀, 剛才好熱, 無著外套。」

跟着便睡着了。

明天考試, 睇你平時有幾專心温習啦!

懶瞓豬

2010-12-31T23:45:00.000-08:00

天氣開始轉冷, 軒說睡覺蓋的被不夠暖, 爸叫他過去一起睡。

軒比爸早睡, 但又想知爸幾時上床, 就叫爸:「你瞓果時細細力拍吓我隻手, 咁我就知道啦。」

唉, 爸將他成個身移返正瞓都無反應呀!

擔心

2010-12-26T23:43:00.000-08:00

今早爸帶軒去聖堂, 坐下後, 爸去辦告解, 同軒講: 「我去揾神父傾一陣間, 十分鐘左右返來, 你响度等我, ok? 」

因為人多, 爸在二十分鐘後才回去找軒, 爸都知軒會好擔心, 可能會喊。但抱着一絲希望, 希望軒長大了、不怕了。

遠遠望見軒, 已發現他神色緊張, 拿起(爸的)電話在講, 爸心知不妙, 快步跑回去, 抱緊軒, 不停安慰他說: 「放心吧, 爸不會自已走的, 任何情况都會回來的, 知嗎! 」

好友.. 相聚

2010-12-25T01:08:00.000-08:00

今個聖誕節, 相約了幼稚園的朋友仔去大尾督踏單車、燒野食, 相聚一返。

軒第一次在街道上踏單車, 人又多又有車, 又不懂規則, 「逆線行車」, 好驚會發生意外, 幸好有小意外、沒受傷!

其實軒最開心的是同朋友仔見面, 歡聚一刻。

有家長提議大家做個時間囊, 於六年後小學畢業的時候打開, 再重溫今日的情懷! 軒寫了一封信給未來的自己, 希望到時可以跟大家再聚頭, 一起打開時間囊呢。

聖誕派對

2010-12-22T22:48:00.000-08:00

我都忘記小學有無聖誕派對, 但軒學校就有, 還好似幼稚園般每人帶一些食物回校分享。

帶什麼食物是小朋友自己決定的, 但軒腦裡面只有一種食物, 還好, 軒畢竟長大了, 懂得幫手準備呢。

狼來了」的故事

2010-12-11T22:47:00.000-08:00

發生了陸運會事件之後, 媽媽講了「狼來了」的故事, 希望軒知道講大話的後果, 以後都做個誠實的人。

得獎

2010-12-10T22:49:00.000-08:00

早前測驗, 成績最好的數學科, 獲得了:

減肥

2010-12-08T22:42:00.000-08:00

軒參加了學童保健, 今天早上做了檢查, 都無大問題, 醫生只是輕描淡寫的說了一句:「咦, 重咗幾磅, 要減肥喎!」

因為默書一百分, 媽獎軒食隻大雞脾, 但軒一見到, 就話:「醫生話要減肥喎……唯有不食皮啦! 」

食完飯, 媽再拿一盒紙包菊花茶給軒, 軒今次話: 「醫生都話要減肥…… 少甜就OK啦。」

唉, 人講一句好過我講十句。

講大話

2010-12-07T22:32:00.000-08:00

上星期六學校舉行陸運會, 軒參加了賽跑及擲豆袋比賽。

放學後軒說陸運會取消了, 爸媽都不以為然。

但今天看到學校網頁公佈成績, 才得知真相。

問軒：「你又話運動會取消了？」

軒才告知：「其實係我比賽輸了, 不想你知, 所以話取消了。」

媽媽最後要輔導一番, 告訴他正確的觀念。

動態版清明上河圖

2010-11-28T22:31:00.000-08:00

動態版清明上河圖吸引大批市民前去欣賞, 我們今天便去看這幅「名畫」。

可能已是展出的尾聲, 人沒有想像那麼多, 還可以慢慢的從「日出看到日落」。

黄老師電話家訪

2010-11-24T22:18:00.000-08:00

今天班主任黃老師致電做了個家訪。

她在電話裡說: 「晨軒在校好乖、好守規矩, 上課亦非常專心, 所以選他做班長。

「唯一要做好一點的是要記住同學的名字, 他到現在還只是記住學號, 不記名字, 上課二個月了, 正常是會叫名字的。」

所以從今天起, 跟軒談學校的事情時, 一定要他說出同學的名字。

中獎

2010-11-22T22:18:00.000-08:00

軒早前響應學校, 買了明愛賣物會的抽獎券, 今天食完晚飯一齊對抽獎結果。

結果.......當然無份中獎。

一知道無中, 軒即刻話:「都唔中, 早知唔買啦。」

媽一聽到就答:「咁唔會一定中o架, 你買獎券目的係咩呀?」

軒:「中獎!」

係幫人呀, 仔!

寄居蟹

2010-11-21T22:17:00.000-08:00

約了朋友仔掘蜆, 一齊拿起裝備就行出海掘掘掘, 好快就裝滿三大桶, 好多都又肥又大, 好正。

掘蜆中途, 見到有個貝殼好大好靚, 於是拿返屋企(軒有這個習慣, 石頭都拿不少)擺。

返到屋企, 洗乾淨, 先發覺有隻寄居蟹响入面, 即刻放佢在金魚缸, 給牠一點水及食物。

希望牠適應環境, 可以住幾日, 一有時間就帶牠回家。

「上堂專心, 讚!」

2010-11-18T22:48:00.000-08:00

學校有四日假期, 今日係最後一日, 所有功課都未做過。

晚上, 做完功課準備沖涼, 軒突然問:「今日幾號?」

媽答:「18號。」

軒:「聽日咪19號, 要中默喎!」

媽:「咦, 係喎, 我都唔記得咗!」

唔怪得老師常當給軒「上堂專心, 讚!」的印仔!!

上癮

2010-11-15T22:47:00.000-08:00

晚飯後捉鬥獸棋, 感覺跟以前不同, 現在他想盡辦法去驘, 爭勝心强了不少。

以前跟他捉, 他總是想讓對方驘, 知道對方鸁了會開心, 自己又沒損失, 所以無所謂, 大家都開心。

現在不同了, 他想鸁的意欲强得多, 每一局都想打敗對手!

可能是嚐過努力而勝利的滋味, 上癮了!

第二次比賽

2010-11-14T22:46:00.000-08:00

第二次比賽, 軒打得比上一次好, 當然仍有很大進步空間。

他們這隊分二組, 每隔幾分鍾交替出場。軒應該是被編入比較好的一組, 因為這組平均技術都較好, 希望軒跟他們一起, 學著他們的技術, 可以進步多一些。

有心..........無力

2010-11-10T22:45:00.000-08:00

軒的鬧事今朝真的六點响!! 可見他是有心做好的....... 奈何本人還是不到八點都願起床。

但真的很用心去溫習, 因此很快便完成。

放學回來更好有信心地說:「今次默書應該有100分!」

盡責

2010-11-09T22:44:00.000-08:00

明天英文默書, 還有些生字未背好, 但軒已經好眼瞓, 所以媽叫軒先瞓, 明天早上再溫。

軒不情不願地上床(他是想先溫習好才瞓), 然後拿著鬧鐘, 說:「咁我聽日六點起身啦!」

第一次比賽

2010-11-07T22:38:00.000-08:00

第一次正式比賽, 軒很投入、很努力, 每次出場都盡自己所能, 為球隊爭取勝利。

鬥心...這正是他所欠缺的。

失望

2010-11-04T20:57:00.000-07:00

今日派回中文及數學測驗卷, 數學有98分(只是大意錯了最簡單的一題), 中文三份卷分別昰81分、85.5分、30分。頭二份卷都是不小心失分, 但聆聽卷只得30分, 我也不知道是什麼一回事。

軒對中文卷沒有90分以上感到很失望!

讚!

2010-11-03T20:56:00.000-07:00

經過昨天一役, 軒今天很有心機做家課, 抵讚!

情緒爆發

2010-11-02T20:54:00.000-07:00

軒今日「反做功課」的情緒又再爆發, 可能今天是學校旅行的原故, 玩完一日又點會有心情工作!

經過媽媽一輕安慰及解釋, 軒率之平靜下來, 慢慢地完成家課。

大意

2010-10-28T20:53:00.000-07:00

軒今日好大意, 於放學前除去外套時, 居然扯跌班長牌都不知道, 返到屋先發現!!!

甩第五隻牙

2010-10-27T20:48:00.000-07:00

軒第二個小息食餅乾作小食, 點知...... 甩咗隻牙!

22號球衣

2010-10-24T20:40:00.000-07:00

冰球正式比賽前, 球隊派發球衣, 而且會用上整個球季, 而軒第一個球季係...22號!

十月全城哈囉喂

2010-10-16T21:20:00.000-07:00

趁住放假, 一家人去海洋公園玩, 但今次係晏少少去, 留夜少少睇「哈囉喂」那些人扮鬼扮馬, 難得軒又好投入!

9月之星

2010-10-13T21:17:00.000-07:00

因為做班長、品行良好, 軒早前被選為9月之星, 今日早會上台拿了這個襟章回來, 十分開心的給爸爸媽媽看。

甩第四隻牙

2010-10-12T21:14:00.000-07:00

食過晚飯, 軒食一枝珍寶珠, 點知一食, 上面已經鬆了的門牙應聲脫落, 仲要跌去馬路中心, 好彩無被車碎。

「噸位」

2010-10-10T21:12:00.000-07:00

第二次冰球比賽練習, 如上次一樣, 一開始係小朋友圍圈跑做熱身。

因為大小球員在一起, 所以有些是比軒高出許多。

途中有幾位小朋友學着比賽時互相碰撞, 有一位高軒半個頭的又學, 經過軒旁邊時撞軒, 點知…撞不動軒而自己跌倒!!!

估不到軒的「件頭」都有番咁上下。

2010-10-08T00:46:00.000-07:00

軒今日放學拿了一幅畫回來, 說是視藝堂做完習多時自己畫的。

究竟係軒叻、定係全班都咁快完成?

腳痛

2010-10-06T00:18:00.000-07:00

軒今日回來同媽媽講:「我隻腳好痛。」

媽問:「點解呀?」

軒答:「個個班長都病咗無返學, 得我一個攞住簿上二樓教員室(軒班房在一樓), 行咗七、八次呀, 啲簿好重o架。」

他都不是第一次講那些簿好重!

眼利

2010-10-05T21:00:00.000-07:00

因為要比賽的關係, 每位小朋友最好有自己的裝備(因為去不同地方比賽, 有時未必可以借到), 爸爸趁着有時間, 用軒上網看款式!

在看手套的時候, 看了幾款, 最後在其中二款做決定。

軒突然問爸爸: 「這個手套手指度有無窿? 」

爸不明：「點解要有窿嘅？」

軒：「用來透氣囉, 另外果款都有。」

最後決定要有窿的一款。

買電腦時已知道他對細節很有要求，但估不到他這麼看東西時這麼仔細。

專心

2010-10-03T00:17:00.000-07:00

冰球練習了很久, 現在終於可以正式比賽! 新一季聯賽即將開始, 軒亦加入了球隊。

但比賽規例一點也不識, 怎辦? 所以今天開始跟Kan Sir學。見他很留心聽講解, 很用心去練習, 爸爸也很開心。

入泳隊(預備組)

2010-09-30T00:16:00.000-07:00

只懂游自由式及背泳的軒, 上次旨在鼓勵他多參與校內活動而幫他報了泳隊選拔試, 今天公布結果-居然入選了!!!!

贏了爸爸

2010-09-25T00:15:00.000-07:00

星期天, 上完聖堂, 一起去麥當奴嘆早餐, 軒例牌要豬柳蛋漢堡(近來至愛, 為了它放棄開心樂園餐玩具), 爸爸要豬柳漢堡, 沒有蛋的。

因為隻蛋都幾「濟」, 所以軒食完個飽, 爸叫他不要吃薯餅, 但他不只食薯餅, 還飲了二杯橙汁!!

刺激玩意

2010-09-23T00:01:00.000-07:00

幼稚園同學在深灣游艇會開生日會, 邀請了軒軒, 一同慶祝之餘也聚舊一番。

原來裡面有很多歷險玩意, 軒跟朋友仔玩得很開心, 而他亦玩了這個其他人不敢玩的:

這個更刺激, 軒今日沒有玩, 因為八月尾去澳門威尼斯人玩過。

矯型鞋

2010-09-22T23:57:00.000-07:00

今日要返屯門醫院檢查對腳, 所以無返學。

醫生睇完軒對腳, 話:「對腳OK喎, 無變差吖。」

媽問:「咁仲要唔要著矯型鞋呀?」

醫生話:「唔洗啦, 掉咗佢啦, 每日企腳踏做運動就得。」

軒聽到之後十分開心, 第一時間拋對矯型鞋落垃圾筒!

八達通表

2010-09-22T00:00:00.000-07:00

自從上小學開始, 軒就有帶手表的習慣, 但有的手表都是裝飾的作用多於報時作用, 所以買一隻新的給他。

問他想要什麽手表(預期他會要公仔手表), 他居然答:「八達通表!」

可能是因為學校不準他帶八達通回校, 所以專登要這樣, 作一點反叛!

雖然這樣, 他帶八達通表卻也方便乘車, 所以批準了!

六點起身

2010-09-21T23:56:00.000-07:00

今個星期六為長週, 早上八時上課, 軒要好早起身, 所以軒自己校鬧鐘, 六點鐘超身, 以作準備。

因為太早的原故, 爸爸媽媽都未醒, 軒就自己玩玩具、睇書、溫習, 一直都無話要再瞓過。

原以為他下晝返學會好攰, 但問佢又話:「無, 唔攰呀!」

但都係提早送佢上床。

燈籠

2010-09-18T21:58:00.000-07:00

中秋節, 小朋友最喜歡玩燈籠。軒也不例外, 所以買了一個給他, 問他要邊款(以為他會答什麼卡通人物), 點知他說要「大紅燈籠」!

問他點解不要其他款, 他答:「之前响街見過, 覺得靚呀。」

為了買這個燈籠, 還要找好幾家店鋪呢!

盡責

2010-09-17T22:10:00.000-07:00

中秋團圓, 大家一起食飯, 妹妹細佬都在。

席間, 妹妹細佬在櫈上跳來跳去, 軒即刻發揮班長本色, 跑去叫佢哋即刻停止, 仲不停「擇名」, 仲擇到一百次!

問軒在班上點樣擇名, 佢話警告三次就擇名, 寫名在黑板上。

爸問:「你記得哂啲名?」佢同另一個班長每人管四行同學。

軒:「唔記得o架, 問佢哋學號寫低囉!」

泳隊選拔

2010-09-16T22:09:00.000-07:00

學校今日舉行泳隊選拔, 軒在不情不願的情況下報了50米自由式。

但軒放學返來話:「爸爸, 你知唔知呀, 我今日游咗100米背泳呀?」

爸:「點解呀, 你淨係報咗自由式喎?」

軒:「老師問我最叻游邊個泳式, 我答背泳, 咁佢咪叫我游囉。

「你知唔知呀, 游水計分o架, 最高分係101分, 我只係得100分咋。」

爸:「咁其他同學幾多分呀?」

軒:「99分、97分咁囉。」

都唔知係咪真!

朋友

2010-09-12T22:08:00.000-07:00

早二日問軒同表妹去海洋公園好無, 佢話寧願約幼稚園同學仔, 因為好耐無見。

所以今日專登約去街, 二個小朋友一見面即刻講過不停, 又講玩具又講小學情況, 樣樣都係好特別又新奇!

希望這段友情可以一直維繫吧。

金手指

2010-09-10T22:07:00.000-07:00

放學回家, 軒有點兒失望的對媽媽說:「今日唔洗帶班長牌呀!」

媽:「點解呀?」

軒:「老師話下星期一先開始。但係今日做咗樣好特別嘅嘢, 就係要上二樓電腦室揾哥哥落嚟整電腦。

「仲有呀, 老師行開咗我要企出去唔好俾其他人傾計。」

媽:「咁佢哋聽唔聽你講呀?」

軒:「有啲唔聽啦。」

媽:「咁你點呀?」

軒:「老師返嚟話俾老師聽。」

媽:「你記得哂同學啲名?」

軒:「未啊, 指佢哋出嚟囉!」

講數

2010-09-10T22:05:00.000-07:00

一早起身, 吃過早餐, 軒如常地溫習功課, 突然間問媽媽:「我考第一好無呀?」

媽媽聽到佢話要考第一, 當然開心啦, 但原來有條件的。

軒繼續說:「不過考到第一妳要送Super Mario (NDS)俾我喎。」

媽一方面開心佢會定立目標, 但又對這樣的「講條件」有保留, 所以還沒有一口答應。

其實佢幾時學識這樣「講數」的呢?

班長

2010-09-09T19:02:00.000-07:00

軒今日拿了個班長牌回來, 說:「老師叫我由聽日開始做班長呀, 仲俾班長牌我!」

爸:「咁你會做幾耐班長呀?」

軒:「唔知呀, 老師話如果我乖就做多幾日喎。」

爸:「係咪輪住做呀?」

軒:「唔知呀, 之前都無人做過, 我係第一個做。

你知唔知呀, 我成日都去校務處o架。」

爸:「點解呀?」

軒:「要幫黃老師攞書去佢張枱!」

爸:「咁黃老師有無攞野呀?」

軒:「無呀, 佢仲响課室教書!」

爸:「得你一個幫手?」

軒:「總共有四個。」

爸:「點解揾你哋?」

軒:「可能我哋乖呢, 一開始就叫我哋, 無揾其他人。」

都係媽媽心水清:「你哋四個係咪最高呀?」

軒:「係呀!」

謎團已經解開。

太緊張

2010-09-07T19:02:00.000-07:00

這幾日軒都食好少午餐, 成日都話無胃口, 與之前自己食一碟飯有很大分別。

起初以為早食午餐的關係(未到12點要上校車), 早餐都未消化, 所以吃不下。但就算提早食早餐及份量少一點, 依然食好少午飯。

軒有帶小食袋回校, 小息時可以吃點小食(小一不可以去食物部), 所以媽準備蛋糕等食物, 等軒肚餓可以食, 但每一天都是原個拿回來, 問他只是答:「唔肚餓。」

因為軒每天都可以好仔細地說出上課的情形及老師的說話, 媽認為是軒太緊張上課, 每分鐘都十分留心, 所以沒有心情食飯。

軒這樣專心當然是好, 希望他儘快適應過來, 回復胃口吧

「豬柳蛋漢堡!」

2010-09-06T19:01:00.000-07:00

學校有個好體貼的安排, 就是讓家長可以在小息的時候, 進入學校在「汽水機」同小朋友見面。

在等校車的時候, 軒突然叫媽媽:「小息時妳响汽水機等我, 我想食豬柳蛋漢堡!」

媽媽問:「你見過其他家長帶俾小朋友?」

軒:「未呀, 我想食之麻。」

媽:「今日唔得啦, 聽日先啦。」

唔知佢到幾時會開始「大個仔」, 唔想在學校見到爸爸媽媽呢?

上小學

2010-09-01T19:00:00.000-07:00

開學啦!

今天正式上小學, 一早起身吃過早餐, 便收拾好書包, 精精神神迎接未來六年的小學生活。

小學開學禮

2010-08-27T18:59:00.000-07:00

華仁小學開學禮, 軒軒第一次正式踏進這家將會渡過六年小學生涯的學校。

這天早上七時半起床, 梳洗後穿著整齊的校服, 便和媽媽出門。不知道是太早起還是心情緊張, 早餐吃了一口麵包便不吃了!

回到學校, 軒軒便與班主任及同班同學一起參觀校園。

放學後, 軒軒很高興的給媽媽看「貼紙卡」, 說他答對問題, 老師獎了貼紙給他, 共有六張, 是全班最多的。

看來他應該很適應小學生活。

負責任

2010-08-25T18:56:00.000-07:00

軒軒一直都好負責任, 係咪自己嘅事都搶住做。

好似今次隻錶無電, 佢自己折開攞粒電出嚟, 自己寫低只有自己睇得明的便條, 然後出行時帶在身, 叫爸爸幫他去買。

買完, 當然係自己換啦！

要求高

2010-08-24T18:52:00.000-07:00

屋企之前用部電腦個touchpad係好平滑的, 因為壞咗, 爸爸有時會攞公司部電腦返去用, 依部個touchpad係有凹凸紋的, 軒軒一直用都無話有唔妥。

因為開學, 要去買一部新的在家用。爸爸臨出門囗, 軒軒居然同爸爸講:「提吓你, 要揀部控制個箭咀果塊嘢要平滑嘅, 唔要凹凹凸凸嘅!」

估唔到細微細眼嘅地方佢都留意到。

玩碼子

2010-07-31T18:51:00.000-07:00

晚飯後, 媽媽跟軒準備開學的物品, 剛好有橡皮圈, 媽媽教軒玩一樣兒時玩意-碼子!

剛開始時軒射極都四圍飛, 練習幾次, 慢慢便可以掌握到技巧了。

畢業旅行 - 台灣

2010-07-21T18:50:00.000-07:00

放暑假, 朋友仔相約去台灣來個「畢業旅行」!

一連五天的行程, 最好玩的首選BabyBoss, 小小世界及參觀101大廈。

於BabyBoss嘗試不同的職業, 賺取工資, 令軒軒有了初步的「賺錢」概念, 之前問他錢從那裡來, 他都只會答:「銀行攞咪有囉!」起碼現在知道要付出才有收獲。

又甩牙

2010-07-19T01:29:00.000-07:00

甩咗第三隻牙, 都係下面嘅!

堅持己見

2010-07-16T01:28:00.000-07:00

畢業聚餐有一個水樽給軒軒作紀念, 因為很有紀念價值(校長提字祝福的), 媽媽不捨得用, 放在一旁準備收好。

今天軒軒要外出, 媽媽着他自己帶水, 軒要用這個紀念水樽, 媽不想, 要求他換另一個, 他不肯, 原因很簡單:「呢個水樽係送俾我, 咁我想用咪用囉!」

斬手指

2010-07-15T01:27:00.000-07:00

上完第一堂小DJ, 軒軒同爸爸講:「今日老師問首歌同新聞之間有幾多秒, 得我答啱12秒咋, 其他人都答錯咗。」

爸問:「你係數住定係估o架?」

軒答:「估o架咋!」

爸:「...吓!?」

軒叫爸爸:「下堂我要借你隻手指呀。」

爸:「邊隻呀? 斬開我會好痛喎。」

軒:「唔係呀, memory手指呀, 幫我錄男兒當自強, nobody, 同whale's sneeze落去。」

爸:「哦。」

2010-07-14T01:13:00.000-07:00

一放暑假, 暑期活動已經開始! 早上學做小DJ, 下午參觀水警輪。

軒軒睇得好開心, 好投入!

最後一堂課

2010-07-12T01:12:00.000-07:00

今日係最後一天在聖保羅堂幼稚園上課, 亦即是最後一天穿上幼稚園的校服!!

雖說是上課, 其實是結業聚餐, 跟以往的校內聚餐一樣, 每位小朋友帶一些食物回去, 與其他人分享。軒軒今次所揀的, 與以往一樣, 都是最多功夫準備的一種, 今次是壽司!!

因為昨天出外, 沒有時間自己做, 所以只是買回來。對軒軒來講, 可以跟朋友仔分享, 才是最開心的!

畢業禮

2010-07-10T22:48:00.000-07:00

今日係聖保羅堂幼稚園的畢業禮, 軒軒也完成整個幼稚園的生活, 暑假後便進入另一個人生階段!

之前軒也跟爸媽提過, 畢業禮上他班會表演打功夫, 而他會舞龍, 還不只一次提醒爸爸他在那一個位置!

表演當然精彩, 但最感動的是看到他「長大」了!

藥丸

2010-07-08T20:09:00.000-07:00

因為皮膚敏感, 手手腳腳都生咗好多粒粒! 媽媽帶軒軒去睇醫生, 醫生話要食抗敏感藥。

一聽到要食藥, 軒軒即刻拍一下醫生隻手, 話:「我唔飲藥水, 食藥丸得啦!」

嚇到醫生都呆一呆

上心

2010-07-07T01:14:00.000-07:00

上星期收到小學寄來的信, 要求學生明天到學校注冊。

因為封信收信人係軒軒, 所以給他自己讀。當他知道要去注冊, 居然十分上心, 回到幼稚園都話哂俾老師聽佢朋天不上課、要去注冊!!

最後, 佢梗係返學啦。

謝師宴

2010-07-03T18:47:00.000-07:00

畢業啦, 因為學校沒有舉辦謝師宴, 一班有心嘅家長自行籌備, 在銅鑼灣富豪酒店與校長、各位老師、各位同學一起聚餐, 向校長老師們表達謝意之外, 亦與共學多年的同學仔歡聚一刻, 拍照留念!

在此謹向挍長、師長由衷的道謝, 感激這幾年來耐心的教導。祝各師長教學安康。

各位同學, 雖然現在要分開, 請大家不要忘記這幾年的一點一滴, 希望大家保持聯絡。

紀念冊

2010-06-26T01:10:00.000-07:00

最後二個多星期留在聖保羅堂幼稚園, 雖然還未有不捨得的情緒, 但都要為離開做準備, 第一步當然係與朋友仔保持聯絡, 所以今日都買咗紀念冊, 準備派俾同學仔填。

叫軒軒自然揀, 不出所料, 唔係爆丸就係爆旋陀螺!

又算佢好心機, 自己逐張逐張黐自己名個Label上去, 雖然黐到好醜樣, 總算係自己完成。

畢業禮請柬

2010-06-25T01:07:00.000-07:00

今天收到學校請柬, 邀請軒軒出席畢業禮, 才醒覺轉眼間, 軒軒已經幼稚園畢業了!

不知不覺原來已經完成人生的其中一個階段, 現在回頭看, 軒軒在這幼稚園的最後幾個月, 的確「長大」、「成熟」了, 開始少了小朋友的那份稚氣, 多了小學生需要的責任感及自律能力, 希望他可以盡快適應小學生活吧。

問他有否不捨得學校, 他又沒有想象中的大反應, 只有一點點的「不開心」, 原來係因為「我有佢哋電話, 可以成日約出嚟食下午茶!」

紀念冊

2010-06-18T22:18:00.000-07:00

就嚟畢業, 越來越多同學仔派紀念冊軒軒填, 今日收五張, 軒軒即刻話:「洗唔洗咁多張呀?」

媽:「人哋想第二時約你出嚟玩啫。」

軒:「咁都唔洗問我一至十最鍾意邊個數字o架! 仲要星座血型o添, 我點知啫!」

咁又真係無聊咗啲喎。

進步

2010-06-17T22:17:00.000-07:00

幫軒軒報咗E.nopi學數學, 起初一見到要計咁多數都發哂皮氣, 唔肯做。

咁佢做評估時程度又真係比上咗一年嘅同學仔慢。

課堂上佢會做練習, 老師會改, 做唔哂就攞返屋企做, 第一、二堂只係做咗半本, 仲要有錯, 依家第五、六堂, 居然做咗二本, 雖然都有啲錯, 但都比半本果時少!

佢仲要話：「好簡單之嘛！」

食量驚人

2010-06-12T22:06:00.000-07:00

晏晝一家人去飲茶, 點咗十二籠點心, 慢慢歎。

一籠點心有三至四隻, 我哋三個人, 應該有人食多一隻, 估唔到果個人係軒軒! 佢一坐低就話肚餓, 先食咗三個包, 然後每籠點心都食二隻, 夾夾埋埋食得仲多過爸爸媽媽!

依家都食咁多, 發育期點算?

早起

2010-06-10T22:05:00.000-07:00

軒軒近來好早起身, 鬧鐘未響已經醒咗。

今日都一樣, 如常起身之後, 自己換校服(校服掛响門頂, 佢應該唔夠高攞!)、刷牙洗面, 居然仲自己準備早餐! 雖然只係牛油麵包, 但自己準備刀、碟、牛油, 仲自己「查」o添! 真係超乖。

所以媽媽俾咗三個印一個貼紙, 以示獎勵。

零用錢

2010-06-07T22:04:00.000-07:00

之前間唔中都會俾零用錢軒軒, 令佢有個錢旁身。

依家佢就嚟升小學, 應該係時候有零用錢, 而且學校都教小朋友錢的概念, 所以配合學校, 今日開始會每星期俾零用錢軒軒, 雖然只係每星期$10, 但可以俾佢有管理金錢嘅實際經驗, 希望對佢有幫助。