教訓

Lupus近來越來越唔聽話， 好多時叫極都唔郁, 冲凉、 食飯、 飲奶、 瞓覺、 睇書、 甚至去街都係咁， 繼續做自己嘅嘢， 睬都唔睬。 之前爸爸媽媽要不停咁叫， 叫到佢郁為止。 後來叫二聲， 見佢唔郁， 爸爸媽媽就會唔理佢， 自己去做要做嘅嘢， 好快Lupus就會追上來一齊做。 好似冲凉咁， 爸爸叫咗二聲Lupus唔應， 爸爸就會自己入浴室， Lupus一聽到關門聲， 即刻就衝入浴室同爸爸話：「爸爸， 我要冲凉。」 跟住就會好快咁去攞衫同毛巾。

今晚到咗飲奶時， 爸爸媽媽叫Lupus執玩具, Lupus又係叫無反應， 顧住睇電視。 爸爸媽媽唔再叫佢， 十五分鐘後Lupus話要飲奶， 叫爸爸， 爸爸唔理佢； 叫媽媽, 媽媽又唔理佢。 跟住開始喊, 不停話要飲奶！

爸爸就同佢講：「依家夠鐘瞓覺啦， 唔飲奶啦， 去刷牙啦。」
Lupus:「點解嘅？」 （呢句係佢嘅口頭嬋）
爸爸:「頭先叫你飲奶， 你响到做乜吖？」
Lupus:「玩、 發皮氣。」
爸爸:「係囉， 依家夜啦， 無時間飲奶啦。」
Lupus:「點解嘅？」 ..........
爸爸解釋咗好耐， Lupus卒之死死地氣去刷牙瞓覺。