想要個細佬

放學返屋企的時侯， Lupus突然同媽媽講：「媽咪呀， 不如生個細佬俾我湊吓？」

媽媽話：「你幫叔叔湊家晞妹妹同雍尉細佬咪得囉。」

Lupus：「唏， 佢哋都唔係我嘅！」 佢又分得咁清楚！

媽媽：「細妹得唔得呀？」

Lupus：「細佬好啲喎！」 點解呢...？

媽媽：「你要細佬嚟做乜呀？」

Lupus：「湊囉， 湊細佬好玩吖嗎。」

真係俾佢激死， 大個咗佢一定生好多個。

乖仔

近排有個好有趣的現象﹕ Lupus乖咗好多！

以往做功課的時候， Lupus一定要爸爸媽媽坐在旁邊， 寫一個字就要俾爸爸媽媽睇， 心情不好仲要發皮氣唔做o添！ 依家？ 直頭叫你行開唔好阻住， 而佢就好俾心機去做, 好多時十五分鐘就做完所有功課， 仲唔洗點改！

有時又自動自覺去幫媽媽按摩， 一下左一下右， 弄得媽媽好開心。

媽媽現在常常讚Lupus做「乖仔」！

學中文

Lupus近幾個月非常喜歡學中文字， 有時在街上見到一些路牌或者店鋪名， 佢都會記住個字（咁梗係簡單果啲啦）， 然後同爸爸講：「爸爸， 我教你寫個字吖， 咁咁咁.......」

爸問：「呢個咩字嚟o架？」

Lupus：「個『出』字囉！」

爸問：「係喎， 邊個教你o架？」

Lupus：「唏， 果度（指住個『出口』個指示牌）咪有囉， 『出口』個出嗎！」

爸：「你咁叻o既。」

------------------

Lupus有時又會話：「爸爸， 我今日學咗個『晴』字， 寫俾你睇吖。」

爸話：「不如寫『晴天』啦， 個『天』字你都識。」

Lupus攞住個神奇畫板， 寫寫寫寫....