英文名

講開Lupus寫自己個名, 佢開始寫自己個英文名果時, 個"U"字成個"V"字， 而個"S"字好多時都寫到個"3"字咁！



依家就比較好啦

"晨"字

學咗個"軒"字之後, Lupus好多時都寫"軒軒"做自己個名 (以前只係識寫Lupus)。

過咗幾個月， 卒之記得要教佢個"晨"字。 佢又學得好快喎！

再遊香港迪士尼樂園

今日同朋友仔再去香港迪士尼玩。 上次去係Lupus三歲果時。 果次佢一見到任何唔係人樣嘅物體， 都即刻好驚。 所有人物佢都認得哂， 仲好鐘意睇佢哋啲DVD, 但見"真人"就完全另一回事。 今次就好好多啦， 一啲都唔驚， 仲要同佢哋影相影到唔捨得走。 唯一無改嘅就係睇立體影院都喊咗出嚟!

最大收獲應該都係佢：

中哂巴斯光年毒...超級篇

媽媽知道Lupus咁鐘意巴斯光年， 所以一早就準備咗巴斯光年嘅衣服比Lupus响萬聖節箸， 仲同Lupus一齊做o埋巴斯光年背後對翼o添！

中哂巴斯光年毒

乜都唔洗講, 睇相就知啦。 攞住個盒都可以咁.........

懷舊中秋節燈籠

又到中秋節， 攞返個燈籠玩梗係唔少得， 撞啱今年北京奧運， 福娃嘅燈籠更加係必有。 但係最好玩(整果時)嘅係呢個親手做嘅沙田柚皮燈籠啦！

再去長隆

又再去長隆野生動物園玩啦。 今次同二個朋友仔自己去， 多咗好多時間慢慢玩呀！

"軒"字

Lupus終於開始學寫自己個名, 第一個字係個"軒"字。

全班第一?!

Lupus响英藝幼稚園讀完K1, 班主任邀請Lupus出席今屆K3嘅畢業典禮。 點解? 話佢考試得全班第一(?!)， 所以要上台攞獎! 估唔到一生人第一次第一， 就咁就攞咗。

雷暴警告

Lupus 瞓醒後第一時間開電視睇天氣報告。
軒軒﹕「媽咪, 有閃電呀, 有雷雨呀！」
媽媽﹕「係呀? 咁我要叫婆婆唔好搭車入嚟飲茶至得！」
軒軒﹕「點解呀? 係咪因為暴雨 ?」
媽媽﹕「婆婆嚟我哋呢度咁遠 , 落雨路滑比較危險。」
軒軒﹕「驚有閃電打到婆婆嘛！」

太陽、月亮、蚊、蜜蜂與烏龜

軒軒補完普通話後搭小巴回家途中，見到個有趣的現象。時間係下午５點及天晴。
「媽媽，你睇吓！有月亮呀！點解依家有太陽同月亮
嘅？！」軒問。
「哦...因為月亮想早啲出嚟同太陽玩吖嘛！」唔知正確解
釋嘅媽咪唯有糊混過骨。
「媽咪呀，我講個故事俾你聽吖！」
「好呀！」
「個故事係太陽同月亮係好朋友，佢哋一齊玩，玩到夜晚
囉喎，月亮俾好多蚊針呀，咁太陽就用光（太陽光）照死哂Ｄ蚊！」
「之後呢？」
「跟住呢又有蜜蜂針月亮喎，太陽呢用佢啲光照死埋Ｄ蜜蜂！
跟住有隻烏龜嚟咗，佢好唔開心，因為唔見咗爸爸媽媽， 太陽同佢講 :『你爸爸媽媽係屋企等你！』隻烏龜揾番爸爸媽媽啦！
太陽同月亮就休息、瞓覺啦！」

媽媽唔舒服

今朝外出前媽媽覺得頭痛兼好攰。
媽:「亞仔,媽媽好頭痛,我唔同你傾計住。」
軒:「媽咪你唔舒服, 陣間我會拖住你嫁啦, 你要小心啲喎!」
媽:「我知啦, 唔該哂你呀乖仔!」

A Bad Day for Lupus

臨瞓前揀 Noddy CD聽。
軒:「媽咪,呢隻係乜嚟嫁?」
媽:「Noddy and the Bouncy Ball.」
軒:「咁呢隻?」
媽:「Noddy and the Rocket」
.......
軒:「咁呢隻?」
媽:「A Bad Day for Noddy.」
軒:「應該係 A Bad Day for Lupus!」
媽:「點解呀?」
軒:「因為我日日都唔開心嘛!」
媽:「點解呀?」媽媽暗笑‥
軒:「因為日日都要媽媽鬧!」
媽:「咁有乜辨法可以變番A Happy Day for Lupus呢?」
軒:「要乖啲!」
哈哈...

發記茶餐廳

回家時發現發記嘅外賣紙攝喺門口, Lupus 遂據為己有。
晚飯前, 佢攞張外賣紙俾媽咪, 手上揸住本Buzz拍紙簿和筆。
「媽咪, 你想食乜嘢呀?」
「但係我一陣就煮餸啦!」
「唔使麻煩啦, 叫嘢食啦!」
「咁呀, 唔該幫我叫一客吞拿魚壽司吖。」 亞仔就作狀寫底嗰order啦。
「你要重覆我叫咗嘅嘢食至得嫁...」媽媽提醒吓呢位＂伙計＂。
「一客壽司魚。」
「係吞拿魚壽司呀!」
「好...一份吞拿魚壽司。」亞仔再係本Buzz簿上寫呀寫。
「仲有無嘢要呀？」亞仔都幾殷勤。
「唔...幫我叫多一份三文魚頭湯吖。」
「賣哂啦！！」
「呀！？無嗱！」媽媽都愕一愕。「咁要咸魚雞粒炒飯吖, 有無呀？」
「有, 好靚嫁。」吓！？
「伙記呀, 我想問吓個飯係幾多錢？」
「唔使錢嫁。」吓！！？
.
.
.
.

左180, 右100

之前說過Lupus做四歲評估的時候， 被驗出左眼看不楚， 當時安排到屯門醫院做一次詳細驗眼。 這就是Lupus今天去驗眼的結果： 左眼180度散光、 右眼100度。

今天驗眼也驗了好幾次， 眼藥水也滴了二三倘, 幸好Lupus滴第二次眼藥水的時候沒有哭(第一次更有啦), 過程才算順利， 連醫生也讚Lupus勇敢呢！

一般小朋友若果散光左50-100度之內， 是可以不帶眼鏡的。 但因為Lupus左眼有成180度， 便需要佩帶眼鏡去幫助左眼放鬆， 從而抖正情况， 亦令Lupus不會太依賴右眼看東西而令右眼惡化！

所以， 下個月Lupus返屯門醫院配眼鏡之後， 便正式成為四眼一族了。

其實醫生也有提過， 帶眼鏡後如果情况有所改善， 幾年後便可以不用再帶了。 希望如此吧！

母親節

今日一早軒軒就吵醒媽咪。
「起身啦,媽咪! 刷牙洗面啦!」
「我要送禮物俾你吖!」說罷就咚咚咚跑去攞啲神秘禮物入番嚟。
「媽媽,母親節快樂! 我送朶花俾你吖, 仲有"朱咕力腸"吖!」
「嘩! 多謝你呀乖仔!! 好靚吖, 媽媽好鍾意呀!」
「唔使客氣....」

註: "朱古力腸"係亞仔用大紙筒、錫紙、亞圖木卡通膠紙"精製"而成的。

病了

Lupus今日上完普通話班病了。 先叫凍、 後話肚痛、 最後嘔了。 晚上媽媽帶Lupus去睇醫生， 話係感冒菌入肚， 聽落都幾嚴重， Lupus都真係成個軟哂， 鬼咩， 連燒都發o埋。

希望Lupus快D好返啦。

奧運聖火

傳到來采葉庭啦， 最後一棒係............. Lupus!



哈哈哈， 呢個係Lupus今日o係魚疍哥哥度做o架！

小器

今天晚上， 媽媽跟Lupus下棋。 期間媽媽「食」了Lupus一隻棋， Lupus即刻嘟起嘴仔、 拎轉面扮唔開心。 媽媽要安撫一番叫他唔好咁小器， 比返隻棋lupus「食」先笑番！ 真係比佢激暈。

個人八達通

四歲啦， 大個仔啦， 搭車無得免費啦！ 咁點算？ 買張八達通囉。

有睇頭

Lupus現在已養成在上學前澆水的習慣。








早二天播的種籽已開始萌芽了。

綠色環保生活

四月份開始， Lupus 有了自己的一塊小田地去種農作物， 已播種子的有蕃茄、 油麥菜、 及苦瓜。 Lupus昨天跟媽媽一起， 很努力的去翻鬆泥土、 撒種子、 及澆水， 弄至滿頭大汗， 但他仍然很開心。

要有收成， 他還要每天澆水呢！ 希望最後Lupus也可以品嚐自己的「成果」呢。

自畫像

今日Lupus第一次去『魚疍哥哥』度畫畫， 畫了一幅自畫像。

爸爸看了也覺得不錯, 但爸爸心想：「個個小朋友也畫得這樣好， 這並不代表Lupus有天份， 而是『魚疍哥哥』教得十分好。」 但見到Lupus能夠畫得這麼好， 總是會高興的。

加大碼、 有散光

今日要返容鳳書健康院做四歲評估。 先量高：「103cm， 好。」 再磅重：「18.5Kg， 好。」 姑娘話：「嘩， 你比其他小朋友橫好多, 係咪要箸大一個碼嘅衫呀？」

跟住去驗眼。 Lupus咁樣話返比爸爸聽：「首先呢要帶眼鏡喎, 好大o架, 有得咁樣咁樣(二隻手仔一開一合遮住對眼)喎。 然後呢咁樣(左手遮住左眼)讀ABCDEFG.....， 跟住就到呢邊(右手遮住右眼)ABCDEFG...。」

爸爸好奇問：「睇得清唔清楚呀？」 預期Lupus好得戚咁答：「梗係清楚啦！」

點知Lupus話：「呢邊(指住右眼)好清楚， 呢邊(指住左眼)朦呀。」

媽媽撘嘴：「係啦， 姑娘話佢先生有散光呀。」

唉， 睇怕Lupus第時都係四眼仔！

賣旗籌款

今日Lupus一家要幫元朗大會堂賣旗籌款。 Lupus一早起床, 食過早餐便開始工作。 初初都好正經, 後來就真係玩多過做了！

蝴蝶

Lupus在屋苑認識了朋友仔「樂仁」， 而樂仁有一塊小土地種植物， 有時Lupus都會吓澆水。 三月初一齊收割植物嘅時候， 樂仁送咗二條蟲同埋幾隻蝸牛比Lupus養。

估唔到好快, 個二條蟲就結蛹、 蜉化成蝴蝶！

老虎仔

今日去睇老虎。 之前爸爸媽媽已經話比Lupus聽會抱住隻老虎仔影相， 但Lupus都係好驚， 不停咁問：「佢會唔會咬我o架？」、 「 細老虎唔咬, 咁大老虎呢？」、 「我哋唔好揾大老虎呀？」

點知， Lupus一見到隻老虎仔咬住奶樽, 佢就急不及待衝過去隻抱住隻老虎唔放了。

下海

今日主要係享受陽光與海灘。 雖然已經幫Lupus穿好泳褲， 但爸爸媽媽根本無諗過要泳水, 因為知道Lupus最多都只係行出去踢吓水。 點知Lupus自己話要游水, 仲特登將自己浸落水度， 仲話要去浮台?! 估唔到Lupus依家咁大膽。

出發了.... 泰國！

期待已久的旅行終於開始了。 因為早上八點鐘飛機, 六點半前要去到機塲, 所以清晨五點半， 媽媽開始幫仍在熟睡的Lupus換衣服, 其實完全沒有意圖弄醒他， 差不多是沒可能的， 但Lupus醒醒地, 爸爸同佢話：「去旅行啦。」 Lupus一聽到， 完全醒哂， 問：「搭飛機？」 知道之後, 即刻自動自覺去梳洗換衫o添！

一去到泰國, 就有機會坐馬車同.......大笨象！ 大笨象行時好搖, 明明旁邊幾隻大笨象都無搖得咁利害,攪到Lupus差D跌落地呀， 哈哈。

四歲生日

今日係Lupus四歲生日, 生曰快樂!!! 因為要返學, 所以無特別慶祝, 只係夜晚同爸爸媽媽一齊食壽司同蛋糕!

比佢笑暈

今日媽媽同Lupus唱歌， 媽媽唱一句，Lupus跟住歌。 Lupus有一句唱唔到, 媽媽就話：「你真係差吖。」
Lupus諗都唔諗， 就答：「我唔係叉呀， 妳就係匙羹， 爸爸係刀呀。」
笑到爸爸媽媽收唔到聲。

厚面皮

今日同Lupus去行花市, 一去到佢就好開心, 因為見到好多玩具。 Lupus行到邊睇到邊， 仲自己走去拿起玩具玩， 當正係自己屋企， 攤擋哥哥姐姐更係唔放過佢， 不停落咀頭叫佢買, 不過Lupus差不多每次都係同一個答案：「唔買啦。」

揸筷子

今日用「大個仔」筷子食飯呀， 我自己要ｏ架。

唱歌表現

Lupus一直有去合唱團唱歌, 今日是第一次表現。 早上去元朗劇院綵排時, Lupus一行上台就開始喊, 其實當時台下面都無人。 見到這個情况, 爸爸媽媽就用最大努力在休息時幫Lupus做好心理準備。

但都是沒有用, Lupus跟著其他小朋友行出舞台時就放聲大哭， 老師即刻帶他回後台, 原本以為他會錯過這一次表演機會, 誰不知媽媽邊幫Lupus抹眼淚, 邊說：「爸爸在台下等你表現啊！」 就這一句, Lupus就收拾心情, 再次行出舞台, 完成表現。 Hooray......

滾軸溜冰

聖誕節買咗一對滾軸溜冰inline skates比Lupus. 一直都無機會去玩, 今日去完元朗合唱團, 帶咗Lupus去溜冰場試吓。 一著對溜冰鞋佢已經企起身, 仲企得好穩, 無話搖搖擺擺。 最初爸爸拖住佢兩隻手仔慢慢行, 行得兩三個圈, Lupus扶住爸爸一隻手已經可以平衡到, 仲行吓行吓咁自己行ｏ添! 哈, 你真係估佢唔到, 玩多兩個圈, Lupus已經唔洗人扶自己玩!!