再去海洋公園

趁住要續証， 就早少少去海洋公園行吓。 初時落緊雨唔係幾好行， 好彩後尾停雨可以玩得開心啲。

軒軒話要坐吊車, 仲要等最大風最搖果時坐，話咁先刺激喎！ 最後仲要玩激長滑梯，玩咗幾轉仲唔肯走。

太心急

原來簡簡單單的一件事情, 會因為自己的喜惡情緒而影響判斷。

媽媽買了張變形金剛的軟地墊給軒軒, 整張墊係由九塊細嘅組合而成。 今次爸爸媽媽決定唔比提示, 由得軒軒自己砌。

最初砌得好快, 但有一塊放錯位, 可能心急, 一放咗落去就認定係啱, 就算最終圖案唔對, 都只覺得後放的幾塊放錯!

最終都係要平心靜氣先發現問題所在, 不過都花了頗長的時間了。

聖誕舞台劇表演

練習咗近兩個月, 聖伯多祿聖保祿堂嘅聖誕舞台劇表演終於正式開始。 早上十點左右返到聖堂, 做一次最後綵排, 然後十二點正式表演。

觀眾都有唔少, 而且演出亦都好順利!

咁辛苦, 梗係要食返餐啦!

講得出, 做得到

學校今日開聖誕Party, 每位小朋友要帶一啲食物番去分享。 軒軒之前已經同學校講話帶雞翼, 媽媽話雞翼唔可以整定, 要早啲起身煮, 軒軒話佢會幫手。

果然, 今朝响無鬧鐘無人叫嘅情况之下, 自動自覺起身, 仲要大大聲話:「我要幫媽媽煮嘢食o架!」 然後牙都唔擦就急急腳走去廚房, 同媽媽講:「等我做啦。」

率之同媽媽一齊煮咗好好食嘅「可樂雞翼」!

放學同朋友仔一齊坐「人力車開蓬巴士」去ICC食午餐, 估唔到有表演睇o添!

打棒球

今日去睇朋友仔嘅棒球比賽, 軒軒當然無心機睇, 但就好鍾意打, 問人攞咗支球棒同波, 就同朋友仔响旁邊玩, 仲問領隊可唔可以加入佢哋球隊o漆!

制水

去完成日街，買咗餸諗住返屋企煮飯，點知出面爆水管，要制水！！

好彩屋園即刻安排咗水車，我哋唯有去攞水。

軒軒一聽到要「落去」攞水，即刻話佢去，爸爸媽媽留响屋企！ 咁佢一個人梗係攞唔到咁多啦， 爸爸媽媽要去幫手， 不過裝水就唔俾人做！

聖誕畫

下晏軒軒晝水彩畫, 突然間攞住同學仔送俾佢張聖誕咭, 畫咗兩張「聖誕紙」俾爸爸媽媽!

上面仲有佢簽名o添。

童真、好易氹

軒軒都要感恩, 响噚日第一輪自行收生派到香港華仁小學。

因為係政府資助學校, 唔洗面試, 所以軒軒完全唔知報咗依間學校, 甚至未聽過依間學校個名! 但當其他人恭喜佢入到間好學校, 聽得多, 佢又好開心, 同媽媽講:「媽媽, 我好開心入到華仁小學, 依間係好好嘅學校呀!」

依家當人問佢讀邊間小學, 佢都好自豪咁答:「華仁小學, 我好鍾意o架!」

女同學

軒軒今日收到一個女同學送嘅聖誕咭, 爸爸問:「點觧解佢會俾聖誕咭你嘅?」

軒軒:「佢鍾意我囉!」

爸爸:「咁你鍾唔鍾意佢呀?」

軒軒:「都鍾意嘅。」

爸爸:「佢同你同組o架?」 軒軒嗰班分成六小組, 佢喺長腳蟹組。

軒軒:「唔係~」

爸爸:「你平時成日同佢玩?」

軒軒:「係呀!」

無耐之前就話同組嘅男同學係好朋友, 咁快又轉咗!

冲涼唱歌

近排可能多表演, 好多歌曲要練習, 所以上哂腦, 每次冲涼都大大聲一路唱一路冲, 但係出嚟又靜哂!

昂船洲大橋百萬行

今日一家大細接受一個耐力大考驗: 行昂船洲大橋百萬行!

天氣唔算太好, 灰灰地, 有少少涼, 後半部份仲有雨o添! 所以風景睇上嚟無咁靚, 但總算可以親身行吓平時唔會有機會行嘅大橋, 又可以做善事, 都算有意義!

大會估計要大約二小時完成整個行程, 當然依個係以成年人計, 我哋帶住軒軒當然要耐啲, 但都估唔到行咗四個鐘! 我哋12點半出發, 完成時係同2點鐘出發嘅人一齊!

軒軒行咗一半嘅時候開始攰, 好彩遇到朋友仔, 有伴一齊行, 玩吓行吓, 最終都可以自己完成整個行程, 真係叻仔! 中途好多人都坐响地下休息, 而回程搭接駁巴士去青衣時, 短短十分鍾車程, 好多後生仔都瞓咗, 軒軒仲好鬼精神!

最後問軒軒下次仲行唔行, 佢話:「吓! 唔係呱?!」

元朗兒童合唱團表演

都唔記得係第三次定第四次, 不過今次幫元朗兒童合唱團表演係練習得最少嘅一次, 好彩係企定定唱, 唔洗走來走去, 如果唔係實亂哂。

今次係參與2009元朗藝術節表演。

表演完畢梗係要獎勵一吓, 去冒險樂園輕鬆吓啦!

健力士世界紀錄

香港管弦樂團舉辦了一個名為「港樂.星夜.交響曲」的活動, 在香港跑馬地快活谷舉行。 這次活動除了可現場欣賞交響樂團的演出外, 更會同現場觀眾一同吹口琴以打破一齊吹口琴的健力士世界紀錄。

大會要求所有人一齊演奏最少五分鐘(最後演奏了七分多鐘), 而大家亦要留意指揮及節拍, 難得軒軒很用心吹, 完成整首樂曲。

雖然今晚開始轉凉, 而且由入場到演奏等了三個多小時, 但軒軒都好有耐性的等及同朋友仔玩, 所以都好高興有機會有份參與這次有意義的活動, 能夠令他知道合作的重要, 亦能在紀錄上留下名字。

看他多投入!

响明愛賣物會買的其中一個玩具, 是一隻恐龍蛋, 據果位學生所講, 只要注滿水, 便可以 出恐龍。

昨天軒軒就將佢注滿水, 今朝瞓醒, 已經見到....

明愛賣物會

今年嘅香港區明愛賣物會今日响維園舉行, 趁有時間, 帶咗軒軒同朋友仔去行吓。

佢入到去好似行年宵花園咁, 每個檔位都去睇、睇到咩都話買! 不過因為做善事嘅關係, 而且真係好抵, 所以都買咗唔少。

最後仲玩o埋大型遊戲o添!

好消息

軒軒今日有二個好消息俾媽媽。

第一, 今日聖保羅堂幼稚園派回近二個月嘅評估, 軒軒的成績明顯比之前好, 拿到「優」的項目比上一次多。

第二, 上游水課時居然可以自己游一個直池(大概25米)!

坦誠相對

可能近日好多事情發生, 軒軒功課漸深、又要應付多個小學入學面試, 所以變得有點兒頑皮。

爸爸亦因為工作的關係而變得沒耐性、不能包容。

可能就是這樣, 大家都常常互發皮氣。

爸爸發覺問題所在, 所以今晚同軒軒講:「不如爸爸以後都唔發皮氣咯?」

軒軒聽到, 即刻雙眼發光、由心笑出來、但又不敢相信, 不懂說話, 呆了好幾秒, 才笑着說:「都幾好喎。」

爸爸見到這樣的反應, 便知道軒軒近日受的委屈, 心都傷了。

所以爸爸跟軒軒勾手指尾, 約定以後都唔發皮氣。 當爸爸發皮氣的時候, 軒軒就要提爸爸冷靜下來。 而軒軒亦都會乖乖地, 唔再扭計。

蠱蠱惑惑

晚上同爺爺嫲嫲、叔叔嬸嬸、嘉晞雍韋食飯。 嫲嫲攞咗兩張卡通年曆俾軒軒同嘉晞, 兩張係一模一樣, 都有透明膠袋包住。

嘉晞一攞到即刻丟咗個膠袋, 軒軒就無。 食到咁上下, 小朋友都飽, 就响旁邊玩。 嘉晞見到軒軒張年曆有透明膠袋, 就捉住軒軒話:「交換吖, 軒軒哥哥。」

軒軒無啋佢, 淨係話:「兩張一樣o架, 唔洗換啦。」

到最後都敵唔過嘉晞嘅死纏, 都要同佢交換, 不過軒軒好蠱惑咁將年曆由膠袋攞出嚟, 然後淨係同佢換年曆, 換完就將年曆放返入膠袋, 仲話:「換咗啦!」

原諒

爸爸同軒軒道歉, 但軒軒卻不停同爸爸玩, 幸好他都知道爸爸的意思, 接受道歉, 原諒爸爸。

誤會

近來軒軒身體有些小毛病, 爸爸媽媽又無留意, 反而誤會佢染咗壞習慣。

對唔住, 乖仔。 以後會多啲同你溝通了解。 有問題記住出聲呀。

魔境魔境, 邊個最靚?

早上醒來, 軒軒同媽媽看書, 見到有公主的圖片, 媽媽問:「你鍾唔鍾意公主呀?」

軒軒答:「唔鍾意。」 早兩年都好鍾意。 變得咁快!

媽媽問:「點解呀? 啲公主唔靚咩?」

軒軒答:「麻麻地啦。」

媽媽問:「咁你識嘅女孩子邊個最靚呀?」

軒軒答:「你囉!」 冧到媽媽鬼咁開心。

下午去咗APM睇奇異動物展, 見到好多雙頭龜、雙頭蛇、雙頭魚、及其他已知變異嘅動物。 軒軒無乜心機睇, 淨係掛住影相。 最後居然俾主辦單位捉住做訪問。

晚上食完飯返屋企, 叫軒軒冲涼, 佢就入房瞓咗上床, 爸爸催佢, 佢居然好唔耐煩、好似啲反叛青年咁話:「你出返去啦, 唔好理我啦。」

唉, 都唔知响邊度學返嚟, 又要慢慢教!

放風箏

早二日媽媽買了隻變形金剛風箏俾軒軒, 細細隻的。 原本今日同軒軒去海洋公園, 但臨出門, 軒軒話寧願去隔離公園玩新買嘅風箏, 都唔去海洋公園。

今日無風當然飛唔起, 但攞住隻風箏跑跑跑, 都玩得好開心。

甩第二隻牙

第二隻牙率之甩了, 無法啦, 不停咁用手指同條脷去攪佢。

今次又甩得好特別。 軒軒仲食緊藥, 因為係最後一劑量, 佢就咁成支飲, 點知飲完隻牙就响個樽入面!

小病一場

港大同學會小學早二星期因為太多小朋友得了人類豬流感H1N1而停課。

昨日軒軒去了那裡面試, 今天早上喉嚨便痛得很利害, 還有些咳o添! 幸好軒軒還精神。

當然病是跟港大同學會小學沒有關係的! 希望軒軒早日康復吧。

第二隻

上次甩咗隻門牙, 今日旁邊果隻都鬆了, 仲要鬆得好快, 我諗呢兩日都會甩!

第一隻甩咗之後, 依家已經有新牙出了.

轉軚

軒軒依家响西九龍中心學溜冰, 主要係花式溜冰嘅基本動作。 佢有得溜冰又好開心! 不過佢鐘意快多啲, 同埋响人叢中間穿插。

一早醒來, 軒軒跑去叫醒爸爸, 同爸爸講:「今日我同你去溜冰吖。」

難得佢主動提出, 下午就去了西九龍中心玩。

期間不只一次軒軒停落嚟好有興趣咁望住人地練習冰上曲棍球。 於是媽媽問:「你鐘意玩冰上曲棍球, 定係好似依家咁做動作呀?」

軒軒:「冰上曲棍球啦。」

媽咪:「點解呀?」

軒軒:「型啲吖嗎!」

媽咪:「做動作都好型吖。」

軒軒:「做動作係女仔玩o架!」 果時咁啱睇緊電視係女子花式溜冰。

媽咪:「都有男仔o架。」

軒軒:「冰上曲棍球溜得快啲!」

既然佢咁講, 遲啲幫佢轉啦。

宿營

這個國慶/中秋假期我們一家人約了聖保羅堂幼稚園的朋友仔去宿營, 地點是筲箕灣的鯉魚門度假村。

我覺得比較特別的是可以跟朋友仔一起賞月吃月餅, 這是現今很少做的了, 當然軒軒只知道有得玩便開心了!

一連二日的宿營結束了。

人類豬型流感

人類豬型流感已經成為風土病! 軒軒學校已經有二個同學中招, 其中一個仲要係同班! 而同佢一齊學游水的朋友仔都係剛剛痊癒。

甩第一隻牙

軒軒鬆果隻牙, 响頭先食蘋果時, 甩咗啦! 做咗崩牙仔o添。

累, 喊...

上午, 聖保羅堂幼稚園在教會表演, 軒軒是其中一位。 他在家都好努力練習的。



下午, 媽媽如常教導軒軒做功課。 今年的功課深了很多, 不再是往年的連線、寫單字, 而是需要思考的題目, 中文字更是很復雜的。

可能是累的原故, 軒軒寫的字不太漂亮, 改了又改, 而皮氣也越來越大, 頂嘴也越來越語氣重, 率之... 「啪」的一聲, 媽媽已一把掌打了仔一下, 這一掌重得軒軒頭也向後躺了一下。

軒軒即時流淚, 但又沒有大喊, 反而一樣的語氣強硬的反問:「做乜打我喎!」

媽媽跟他解釋, 可能仍心有不甘, 軒軒依然的頂嘴, 率之「啪」, 第二個巴掌已打了過去。

連續受了二個巴掌, 軒軒才知道事態嚴重, 安靜下來。 媽媽花了很多時間令軒軒知道錯在什麼地方。

「有無攪錯!」

軒軒無情情話上山頂行吓, 反正無咩嘢做, 一家大細上咗去山頂凌霄閣吹泡泡。

食完飯搭小巴回家, 車上軒軒不停地攪個大袋, 要揾吹泡泡嗰玩具, 爸爸不停地叫佢坐好, 但軒軒都無理會, 於是爸爸輕輕力捉住佢耳仔問:「聽唔聽到呀?」

但軒軒好大反應咁話:「有無攪錯呀!」

爸爸即刻話:「我叫咗你咁多聲你都唔理, 我都未話有無攪錯, 你同我講有無攪錯!」

佢又好似知道理咁, 完全無發皮氣, 即刻當無嘢。

閃電

軒軒好喜歡Lightning McQueen, 但係一直都無親眼看過閃電。

今晚天氣突然轉變, 爸爸同軒軒由爺爺嫲嫲屋企行去地鐵站時, 有一段露天的路, 可以看到偌大的天空。 我們就這樣站着, 抬頭看閃電怎樣把天空劃成幾片。

搭校車

今日對軒軒來說是一個小轉變, 因為早上會搭校車上學!

媽媽物色到一班校車正正在家門口上車, 而上車時間同自己返係一樣, 而且不用走來走去車站, 舒服一點。

晚上問軒軒坐校車好唔好玩, 佢話:「好玩, 好似坐Roller Coaster咁!」

放學都係由媽媽接。

一家大細去溜冰

爸爸一直都無同軒軒一齊溜冰, 而爸爸其實都唔識! 今日有時間就一家大細去玩一個下晝。

去之前軒軒就用心教爸爸一啲技巧, 但一著住對溜冰鞋, 就一支箭咁衝去玩了。不過估唔到佢可以推住爸爸轉成個圈!

讀書

早二星期爸爸同軒軒去書局, 軒軒話要買書, 爸爸其實好鼓勵軒軒看書, 但屋企已經好多書, 有一些軒軒只係看過幾次。 為了鼓勵他看書, 爸爸同軒軒約定: 「今日買一本書就唔再買啦, 除非你讀三本書給爸爸聽啦。」

睡覺前係爸爸同軒軒睇書的時間。 軒軒突然話:「我讀本書俾你聽吖。」 然後就取出Wall-E故事書, 一個字一個字的讀, 出乎意料地大部分的字都能夠讀出來, 不懂的都大致可以自己拼音拼出來! 雖然本書好簡單, 但爸爸都好感動。

環保袋

新元朗中心舉行環保袋推廣活動, 每人獲得一個米色的環保袋, 然後可以在上面隨便的畫上自己喜愛的圖案及塗上顏色。

這是軒軒的設計, 甚至有「冲天救兵」的圖案呢!

祈禱

自從學識「天主經」之後, 爸爸開始同軒軒念「聖母經」。

今日自己突然同媽媽講:「我識念聖母經呀。」 然後就「萬福瑪利亞, 妳充滿聖寵......」念哂出來!

勇敢獎

今日再去迪士尼, 居然有新玩意, 就係上堂學畫公仔, 難得軒軒好留心, 靚唔靚就見仁見智啦!

軒軒一直怕睇3D電影。 今日媽媽率之成功令軒軒睇完整套電影, 仲睇得好投入、好開心o添!

因為勇敢克服困難, 媽媽送咗個「勇敢獎」俾佢。

甩牙

晚飯有軒軒喜歡的雞, 他選了雞翼吃。 一咬, 他叫:「隻牙好痛啊!」

媽媽說:「你係咪咬到啲骨呀? 唔好咁大力咬啦。」

軒軒:「唔係呀, 隻牙好似鬆鬆哋呀。」

媽媽:「吓, 唔係呱, 睇吓。」

下面其中一隻門牙有少少鬆。 媽媽開始解釋俾軒軒聽:「換牙係正常o架, 你依啲係小朋友牙, 咁大個仔梗係要換啲大人牙啦! 嗱, 換大個仔牙, 即係大個仔, 要乖啲呀!」

健康快車賣旗籌款

聖保羅堂幼稚園幫健康快車賣旗籌款, 軒軒去做義工。 由於天氣非常悶氣, 加上之前一日去海灘玩已經很累, 所以不停地休息喝水。

忙了一個上午, 終於完成任務!

感情用事

同軒軒去睇電影「冲天救兵」。 因為係3D立體電影嘅關係, 每個人都要帶立體眼鏡。

軒軒一見, 就好緊張咁問:「啲公仔會唔會跑哂出嚟o架?」 佢一直對電影, 尤其是立體電影, 都有少少恐懼。 可能佢之前去迪士尼睇立體電影時太細個, 未接受到嚇親, 有陰影。

爸爸同佢解釋清楚, 軒軒都肯帶嚟睇, 不過有啲緊張位, 都係除咗副眼鏡。

成套戲大致上都睇得好開心, 又叫又笑。 但最後軒軒居然喊!!

爸爸問:「係咪唔捨得大鳥呀?」 唔係。

「係咪唔捨得小朋友呀?」 唔係, 但又唔肯講。

之後爸爸諗可能係唔喜歡個壞人跌落飛船。 佢一直都不太喜歡見到唔開心o既事。

再去「史前下水禮」

雖然再去「史前下水禮」, 但同婷婷一齊玩, 都係咁開心。

今次仲玩o埋之前無玩嘅「掘化石」!

溜冰 2

爸爸一直未見過軒軒溜冰, 媽媽之前都拍唔到相片或短片。 今日一見, 又真係好似好快咁。

Hello........ 螢火蟲

今日一家大細跟別人去大埔松仔園玩。 下晝先上山認識一下大自然嘅花草樹木, 食過晚飯後再上山看螢火蟲!

軒軒第一次看, 覺得好新奇! 可惜看到的數量唔多, 每個地方都係一兩隻, 有點兒可惜。

可口可樂廠

軒軒今日去參觀可口可樂廠, 可惜有部份設施維修, 飲唔到新鮮嘅可樂。

再去長隆

今日同爺爺、嫲嫲、叔叔、嬸嬸一起去長隆野生動物園玩, 點知遇上九號風球!

好彩天氣最差時係半夜, 軒軒瞓緊覺, 無影響行程。

今次已經係連續第三年暑假去長隆。

參觀天文台

軒軒今日去參觀天文台, 見到很多奇奇怪怪的設備, 相當有趣!

溜冰

軒軒今日去學溜冰, 見佢又玩得好開心。 可能之前玩過Inline Skate, 熟習咗平衡, 所以好快就上手。

返到屋企仲不停咁教爸爸o添!

跳樓機

海洋公園有一個「兒童王國」嘅部份, 裡面有啲專為小朋友設計嘅機動遊戲。

軒軒最鐘意玩嘅, 係跳樓機! 一玩就唔停, 玩完又玩........


另外, 軒軒每次去都會著運動鞋去。 有次天氣熱, 媽媽叫他著涼鞋, 涼快一點。 軒軒居然答:「著涼鞋好跣, 爬唔到石牆呀。」 你都唔好話佢唔諗o野!

註: 石牆係「兒童王國」的一塊斜坡, 上面有類似供成人爬石的石頭。

地下噴水池

知道東涌有個由地下噴水出來的噴水池好耐, 好多人都喺度玩水。 一直想同軒軒玩, 但都無準備。 今日去東涌揾爺爺嫲嫲飲茶, 之後卒之.......

海洋公園「史前夏水禮」

海洋公園現在有個「史前夏水禮」嘅節目, 俾大家去玩玩水、消消暑。 軒軒今日同朋友仔去玩, 仲玩得好開心。

有個遊戲, 軒軒連大姐姐都贏到!

以相機代眼

今日去餐廳食午飯， 睇吓有咩食嘅時候， 軒軒攞住部相機， 仲用鏡頭睇路o添！

Super Lemon

好多人都試過Super Lemon這種糖， 好酸好酸， 一放入口成塊面都會扭曲。

今日同軒軒去科學館， 剛好有糖果的講解及實驗， 其中一個就係食呢種糖， 試吓反應係點。

結果？

見牙醫

今日媽媽帶軒軒去見牙醫檢驗牙齒。 去到之後, 軒軒第一個瞓上去牙醫張檢查椅, 乖乖的張開口俾牙醫睇。 雖然有啲緊張, 但都無話發皮氣、扭計, 都算係咁。

檢查之後, 牙醫話軒軒啲牙齒生得算好, 無蛀牙, 牙縫都夠開, 換牙時有足夠的空間俾恆齒生長 (爸爸媽媽仲以為生得差o添), 只係門牙太o埋, 要留意一吓。

檢查完牙醫仲幫軒軒洗乾乾淨淨、白雪雪。 軒軒又好聽牙醫話, 得住唔好食咁多糖同飲咁多有顏色嘅飲品。

赤身露體

軒軒有個好奇怪嘅習慣, 就係唔會响其他人面前赤身露體, 就算只係上身都唔會, 下身更加唔好諗。

好似同佢去完沙灘玩, 要沖身, 响外面嘅沖身花洒只會著埋衫褲一齊冲, 唔好試圖除佢件衫, 佢係會拉到實。 真係要冲, 只可以喺獨立嘅格先得。

其實莫講話响外面, 就算响廁所, 要除衫都只可以喺廁格鎖埋門。

唔知佢諗咩呢?

廸士尼女孩

自從軒軒申請咗迪士尼全年証之後, 己經去過好幾次, 因為有新設施, 今日再去玩。

等車的時候, 見到另一個都係去廸士尼的女孩子「婷婷」。 原先都無話一齊玩, 落車之後, 大家各自去廁所, 出來的時候, 軒軒拉住媽媽, 話:「等埋啦!」

婷婷都係常客, 好清楚行程又樣樣都肯玩, 軒軒同佢一齊, 慢慢都跟住又跳舞又玩水, 呢啲都係佢平時唔肯玩, 可能有伴, 樣樣都肯試!

新單車

軒軒架Thomas單車其實已經太細架, 踏起上來好辛苦好難平衡, 一定要不停踏先得, 如果唔係好易會跌。

所以今日媽媽買咗一架大單車俾佢, 但又好似大咗少少, 佢唔夠高, 個座位放到最低先企到响地, 攪到個腳踏高咗啲, 踏嘅時候對腳會屈得好厲害。

好彩佢都控制到!

唔願輸

夜晚, 食完飯, 一家三口玩新遊戲-「Blokus」! 呢個遊戲係每人有一啲好似「砌磚」嘅方塊, 然後好似圍棋咁, 响遊戲板上面盡量圍多啲地。

軒軒可能唔係好識玩, 佢係第一個出唔到方塊, 只可以坐响到望住爸爸媽媽玩。

爸爸不停咁叫佢自己諗吓點解會輸, 心有不甘, 卒之發皮氣。 重要嬲到坐响厠所度大喊, 話:「我好嬲爸爸, 唔再同佢傾計呀。」

媽媽話軒軒上咗棋班之後, 開始有鬥心、唔願輸嘅心態, 所以反應咁大。

第一次念聖母經

今天堂區家訪， 修女跟三位姊妹在晚上九時許， 帶著聖母像來到家中， 一起於二零零九年這個聖母月頌念聖母經。 這是軒軒第一次念聖母經， 因為爸爸懶惰的關係， 亦係佢第一次念經！

初時佢有些不自在，可能不習慣這麼多人在家吧， 也可能不習慣坐定定呢。 念了一端之後， 爸爸給軒軒坐在自己大腿上， 教他念一篇經數一粒念珠， 陪他這樣子安定地完成餘下的四端。

經過一輪「熱身」， 軒軒終於跟修女有講有笑了。 最後修女送了一個從法國帶回來的聖母像掛墜給軒軒呢！

p.s.: 軒軒的聖名是Bosco。
p.p.s: 爸爸以後會努力都軒軒祈禱的。

母親節禮物

Lupus平時有儲起一些零用錢 (其實係搶返嚟， 好多時找錢佢都扣起大餅〕， 今日佢自已話要送花比媽媽， 仲帶媽媽出去買。

離遠見到花檔， Lupus已經一支箭跑過去， 大大聲同姨姨講：「唔該我想買花比媽咪呀。」 爸媽企後兩步， 由佢自己作主。

姨姨好有耐性咁介紹：「呢啲十蚊， 呢啲四十， 呢啲五十， 你睇吓鍾意邊啲。」 Lupus走去攞咗一束四十蚊o既， 但又唔記得幾錢， 又問：「呢啲幾錢呀？」 「四十蚊。」

Lupus：「嘩， 咁貴？！ 不如買十蚊果啲啦。」 媽媽忍唔住：「唔係呀。 起碼買四十蚊果啲啦。」

比錢又好爽手。 買完之後媽媽話不如買比對面陳太， Lupus買咗支十蚊o既， 比錢都好爽手。 但當媽媽話買一束五十o既比嫲嫲， 佢即刻面露為難之色：「咁貴！ 無哂錢啦。」

姨姨都俾佢笑死， 見佢咁樣， 即刻俾個折頭：「四十蚊俾你啦。」 Lupus好開心， 俾完錢仲同姨姨講拜拜o添！

帶口罩

學校一直都要求每位小朋友都準備口罩在書包， 在流感開始前已是這樣。

因為豬流感的關係， 口罩更不可缺。 學校沒有硬性要求學生一定要戴上口罩， Lupus進入學校的時候亦沒有戴上。 但媽媽接放學的時候， 已有一個口罩在Lupus的面上了。 劉老師話係Lupus自己要求的， 衛生啲喎！

第二次表演

今次係Lupus第二次參與元朗兒童合唱團的歌唱表演， 相比去年的一次，今次真係一大進步。 除了沒有喊之外， 在台上更加配合指揮導師的帶領， 又唱又跳的由頭表演到尾！

最可惜係初段企在後面， 被其他小朋友遮住了。

校園廣播站

Lupus學校有個廣播的地方， 給學生向公開講一些報導， 就好似電視的新聞報導的佈景一樣。 由老師邀請學生在上課前分享。

今天是Lupus第二次上廣播站， 上一次好像是去年十一月報導天氣消息， 今次自由發揮。 他回來的時侯話講返之前同姨長姨媽行山的趣事， 仲帶回行山時拾的啞义給大家看呢！

真想親身看一下他作報導呢。

妹妹?！

Lupus生日的時侯， 大舅父送了一隻小狗俾佢， 係電子玩具果種 (如果係真嘅媽媽一定嚇暈)。 今天搬去高街， 媽媽話：「不如帶狗仔過嚟看門口囉？」

回家後Lupus即刻拆開狗仔玩具， 叫佢做妹妹， 仲幫佢起咗個名叫「心心」o添！ 媽媽問：「點解叫『心心』呀？」

Lupus：「唏， 佢有愛心嗎！」

跟住同「心心」玩得好開心， 瞓覺都要一齊， 仲無忘記幫佢刷牙o添。 瞓前睇書， 之前係爸爸媽媽讀， 今次....... 係Lupus讀俾妹妹聽！

不過有好幾次Lupus自己玩計數板同獨數， 佢都自動自覺將妹妹熄咗。 有次媽媽問：「咦， 妹妹呢？ 你唔佢一齊玩？」

Lupus居然答：「我要專心嗎！」

踏單車

媽媽其實幾有計， 噚日同Lupus去海洋公園叫到佢玩激流旅程之外， 今日又可以令到佢自己要求拆咗單車兩個輔助輪去踏單車， 仲跌極都唔怕o添。

率之試咗差唔多兩個鐘之後就學識啦！ 不過， 代價就係多咗幾條疤响塊面度， 做咗花面貓。

好幫手

近幾日準備搬屋， 爸爸媽媽忙著收拾東西， 又要到新屋做清潔， 沒有時間陪Lupus玩， 只可以抽少少時間同Lupus去附近公園玩吓。

但原來Lupus更加喜歡幫手做事。 自己的東西爭住去收拾， 又幫爸爸將箱子封好膠紙。 去到新屋又揸住掃把四圍掃， 真係叫都唔肯放低！

想要個細佬

放學返屋企的時侯， Lupus突然同媽媽講：「媽咪呀， 不如生個細佬俾我湊吓？」

媽媽話：「你幫叔叔湊家晞妹妹同雍尉細佬咪得囉。」

Lupus：「唏， 佢哋都唔係我嘅！」 佢又分得咁清楚！

媽媽：「細妹得唔得呀？」

Lupus：「細佬好啲喎！」 點解呢...？

媽媽：「你要細佬嚟做乜呀？」

Lupus：「湊囉， 湊細佬好玩吖嗎。」

真係俾佢激死， 大個咗佢一定生好多個。

乖仔

近排有個好有趣的現象﹕ Lupus乖咗好多！

以往做功課的時候， Lupus一定要爸爸媽媽坐在旁邊， 寫一個字就要俾爸爸媽媽睇， 心情不好仲要發皮氣唔做o添！ 依家？ 直頭叫你行開唔好阻住， 而佢就好俾心機去做, 好多時十五分鐘就做完所有功課， 仲唔洗點改！

有時又自動自覺去幫媽媽按摩， 一下左一下右， 弄得媽媽好開心。

媽媽現在常常讚Lupus做「乖仔」！

學中文

Lupus近幾個月非常喜歡學中文字， 有時在街上見到一些路牌或者店鋪名， 佢都會記住個字（咁梗係簡單果啲啦）， 然後同爸爸講：「爸爸， 我教你寫個字吖， 咁咁咁.......」

爸問：「呢個咩字嚟o架？」

Lupus：「個『出』字囉！」

爸問：「係喎， 邊個教你o架？」

Lupus：「唏， 果度（指住個『出口』個指示牌）咪有囉， 『出口』個出嗎！」

爸：「你咁叻o既。」

------------------

Lupus有時又會話：「爸爸， 我今日學咗個『晴』字， 寫俾你睇吖。」

爸話：「不如寫『晴天』啦， 個『天』字你都識。」

Lupus攞住個神奇畫板， 寫寫寫寫....

鎮定？ 驚徨？

今日去完元朗合唱團， 爸爸帶了Lupus去Jolly Kingdom學phonics。

因為明天Lupus開生日會， 爸爸要幫手買東西， 所以在Lupus入課室之前同佢講：「爸爸要去買東西， 可能會遲少少才回來接你。 如果你出來見唔到爸爸， 你响度等陣間， ok?」

Lupus應承了之後就入去上課。

爸爸買完東西回去接Lupus的時侯， 真的遲了五分鐘。 當打開Jolly Kingdom的大門， 已經見到Lupus企在電話前按鍵， 心想：「Lupus一定等得唔耐煩打電話俾我！」

果然， 電話即時響起。

爸爸接聽電話， 但當Lupus轉身見到爸爸的時侯， 已說不出話， 表情就好像失散很久終於再見面一樣， 有些傍徨、被驚嚇、但又安心的復雜心情表露無遣。

Lupus生病了

唔知係咪出街食飯食得太多同太雜， Lupus個肚仔卒之頂唔順， 又疴又嘔！

先係星期六晚响乳猪大王食飯時嘔到成枱都係， 跟住成個星期都肚仔痛。

體重仲急降o添。 但都要食返清淡啲先得啦。

掛住爸爸

因為開學嘅關係， Lupus同媽媽返咗香港仔住。

噚日Lupus做功課的時候俾媽媽鬧， 可能真係鬧得好淒凉，佢話要打電話俾爸爸。 一聽到爸爸把聲， 終於忍唔住大喊咗出嚟， 仲要係喊到講唔到嘢果種， 淨係斷斷續續咁話﹕「爸爸.... 好掛....住....你呀........我......好愛你呀........！ 我想見......你呀！」

聽到佢咁講， 爸爸個心又酸又感動！

放煙花

炮竹一聲除舊歲， 煙花一燒迎新禧。

年初二Lupus同爸爸媽媽去澳門行吓， 最主要係睇吓有無得燒炮仗。 去到澳門坐低食午飯嘅時侯， 問啲侍應邊度可以燒炮仗， 佢哋居然話無得燒！ 我哋信以為真， Lupus十分之失望， 仲差啲喊咗出嚟， 好彩媽媽用「猪扒飽」呢個絕招先令到Lupus開心番 (Lupus叫食猪扒飽叫咗幾個月啦)。

為咗食飽， 一齊坐巴士去氹仔， 點知過咗橋俾爸爸見到燒炮仗嘅地方！ 於是去完猪扒飽 (因為太多人排隊買， 所以無食到)， 就興致勃勃去燒炮仗。

初初Lupus去到燒煙花嗰度 (因為安全問題， 只係放煙花)， 又嫌啲煙臭、 又嫌人哋啲炮仗嘈， 不過玩兩玩， 咩都唔理囉， 仲玩到唔捨得走o添！

長衫？ 裙？

年初一， 準備出去拜年， 去得拜年梗要著新衫啦。 媽媽今年買咗件唐裝長衫俾Lupus， Lupus一見到就好唔開心咁話：「我唔著呢件呀， 呢條裙嚟o架， 係女仔著o架， 我都唔係女仔！」
媽媽解釋：「呢條唔係裙嚟o架，以前啲衫係咁長o架！」
最後Lupus都著住去拜年！

大吉大利

年二十九， Lupus好有興趣自己寫揮春， 媽媽於是買咗毛筆、墨水、同o埋大紅紙， 比佢寫個夠。
問Lupus想寫乜嘢，佢居然話：「大吉大利， 同個福字！」
媽媽：「你識唔識寫個『吉』字同個『利』字呀？」
Lupus：「劃咪得囉！」
媽媽：「個『利』字點劃呀？」
Lupus：「劃條脷囉。」
媽媽：「唔好咁醜樣啦， 我教你寫啦。」
經過一輪功夫， 率之寫成咁！