懶瞓豬

天氣開始轉冷, 軒說睡覺蓋的被不夠暖, 爸叫他過去一起睡。

軒比爸早睡, 但又想知爸幾時上床, 就叫爸:「你瞓果時細細力拍吓我隻手, 咁我就知道啦。」

唉, 爸將他成個身移返正瞓都無反應呀!

擔心

今早爸帶軒去聖堂, 坐下後, 爸去辦告解, 同軒講: 「我去揾神父傾一陣間, 十分鐘左右返來, 你响度等我, ok? 」

因為人多, 爸在二十分鐘後才回去找軒, 爸都知軒會好擔心, 可能會喊。 但抱着一絲希望, 希望軒長大了、不怕了。

遠遠望見軒, 已發現他神色緊張, 拿起(爸的)電話在講, 爸心知不妙, 快步跑回去, 抱緊軒, 不停安慰他說: 「放心吧, 爸不會自已走的, 任何情况都會回來的, 知嗎! 」

好友.. 相聚

今個聖誕節, 相約了幼稚園的朋友仔去大尾督踏單車、燒野食, 相聚一返。

軒第一次在街道上踏單車, 人又多又有車, 又不懂規則, 「逆線行車」, 好驚會發生意外, 幸好有小意外、沒受傷!

其實軒最開心的是同朋友仔見面, 歡聚一刻。

有家長提議大家做個時間囊, 於六年後小學畢業的時候打開, 再重溫今日的情懷! 軒寫了一封信給未來的自己, 希望到時可以跟大家再聚頭, 一起打開時間囊呢。

聖誕派對

我都忘記小學有無聖誕派對, 但軒學校就有, 還好似幼稚園般每人帶一些食物回校分享。

帶什麼食物是小朋友自己決定的, 但軒腦裡面只有一種食物, 還好, 軒畢竟長大了, 懂得幫手準備呢。

狼來了」的故事

發生了陸運會事件之後, 媽媽講了「狼來了」的故事, 希望軒知道講大話的後果, 以後都做個誠實的人。

得獎

早前測驗, 成績最好的數學科, 獲得了:

減肥

軒參加了學童保健, 今天早上做了檢查, 都無大問題, 醫生只是輕描淡寫的說了一句:「咦, 重咗幾磅, 要減肥喎!」

因為默書一百分, 媽獎軒食隻大雞脾, 但軒一見到, 就話:「醫生話要減肥喎……唯有不食皮啦! 」

食完飯, 媽再拿一盒紙包菊花茶給軒, 軒今次話: 「醫生都話要減肥…… 少甜就OK啦。」

唉, 人講一句好過我講十句。

講大話

上星期六學校舉行陸運會, 軒參加了賽跑及擲豆袋比賽。

放學後軒說陸運會取消了, 爸媽都不以為然。

但今天看到學校網頁公佈成績, 才得知真相。

問軒：「你又話運動會取消了？」

軒才告知：「其實係我比賽輸了, 不想你知, 所以話取消了。」

媽媽最後要輔導一番, 告訴他正確的觀念。

動態版清明上河圖

動態版清明上河圖吸引大批市民前去欣賞, 我們今天便去看這幅「名畫」。

可能已是展出的尾聲, 人沒有想像那麼多, 還可以慢慢的從「日出看到日落」。

黄老師電話家訪

今天班主任黃老師致電做了個家訪。

她在電話裡說: 「晨軒在校好乖、好守規矩, 上課亦非常專心, 所以選他做班長。

「唯一要做好一點的是要記住同學的名字, 他到現在還只是記住學號, 不記名字, 上課二個月了, 正常是會叫名字的。」

所以從今天起, 跟軒談學校的事情時, 一定要他說出同學的名字。

中獎

軒早前響應學校, 買了明愛賣物會的抽獎券, 今天食完晚飯一齊對抽獎結果。

結果.......當然無份中獎。

一知道無中, 軒即刻話:「都唔中, 早知唔買啦。」

媽一聽到就答:「咁唔會一定中o架, 你買獎券目的係咩呀?」

軒:「中獎!」

係幫人呀, 仔!

寄居蟹

約了朋友仔掘蜆, 一齊拿起裝備就行出海掘掘掘, 好快就裝滿三大桶, 好多都又肥又大, 好正。

掘蜆中途, 見到有個貝殼好大好靚, 於是拿返屋企(軒有這個習慣, 石頭都拿不少)擺。

返到屋企, 洗乾淨, 先發覺有隻寄居蟹响入面, 即刻放佢在金魚缸, 給牠一點水及食物。

希望牠適應環境, 可以住幾日, 一有時間就帶牠回家。

「上堂專心, 讚!」

學校有四日假期, 今日係最後一日, 所有功課都未做過。

晚上, 做完功課準備沖涼, 軒突然問:「今日幾號?」

媽答:「18號。」

軒:「聽日咪19號, 要中默喎!」

媽:「咦, 係喎, 我都唔記得咗!」

唔怪得老師常當給軒「上堂專心, 讚!」的印仔!!

上癮

晚飯後捉鬥獸棋, 感覺跟以前不同, 現在他想盡辦法去驘, 爭勝心强了不少。

以前跟他捉, 他總是想讓對方驘, 知道對方鸁了會開心, 自己又沒損失, 所以無所謂, 大家都開心。

現在不同了, 他想鸁的意欲强得多, 每一局都想打敗對手!

可能是嚐過努力而勝利的滋味, 上癮了!

第二次比賽

第二次比賽, 軒打得比上一次好, 當然仍有很大進步空間。

他們這隊分二組, 每隔幾分鍾交替出場。 軒應該是被編入比較好的一組, 因為這組平均技術都較好, 希望軒跟他們一起, 學著他們的技術, 可以進步多一些。

有心..........無力

軒的鬧事今朝真的六點响!! 可見他是有心做好的....... 奈何本人還是不到八點都願起床。

但真的很用心去溫習, 因此很快便完成。

放學回來更好有信心地說:「今次默書應該有100分!」

盡責

明天英文默書, 還有些生字未背好, 但軒已經好眼瞓, 所以媽叫軒先瞓, 明天早上再溫。

軒不情不願地上床(他是想先溫習好才瞓), 然後拿著鬧鐘, 說:「咁我聽日六點起身啦!」

第一次比賽

第一次正式比賽, 軒很投入、很努力, 每次出場都盡自己所能, 為球隊爭取勝利。

鬥心...這正是他所欠缺的。

失望

今日派回中文及數學測驗卷, 數學有98分(只是大意錯了最簡單的一題), 中文三份卷分別昰81分、85.5分、30分。 頭二份卷都是不小心失分, 但聆聽卷只得30分, 我也不知道是什麼一回事。

軒對中文卷沒有90分以上感到很失望!

讚!

經過昨天一役, 軒今天很有心機做家課, 抵讚!

情緒爆發

軒今日「反做功課」的情緒又再爆發, 可能今天是學校旅行的原故, 玩完一日又點會有心情工作!

經過媽媽一輕安慰及解釋, 軒率之平靜下來, 慢慢地完成家課。

大意

軒今日好大意, 於放學前除去外套時, 居然扯跌班長牌都不知道, 返到屋先發現!!!

甩第五隻牙

軒第二個小息食餅乾作小食, 點知...... 甩咗隻牙!

22號球衣

冰球正式比賽前, 球隊派發球衣, 而且會用上整個球季, 而軒第一個球季係...22號!

十月全城哈囉喂

趁住放假, 一家人去海洋公園玩, 但今次係晏少少去, 留夜少少睇「哈囉喂」那些人扮鬼扮馬, 難得軒又好投入!

9月之星

因為做班長、品行良好, 軒早前被選為9月之星, 今日早會上台拿了這個襟章回來, 十分開心的給爸爸媽媽看。

甩第四隻牙

食過晚飯, 軒食一枝珍寶珠, 點知一食, 上面已經鬆了的門牙應聲脫落, 仲要跌去馬路中心, 好彩無被車碎。

「噸位」

第二次冰球比賽練習, 如上次一樣, 一開始係小朋友圍圈跑做熱身。

因為大小球員在一起, 所以有些是比軒高出許多。

途中有幾位小朋友學着比賽時互相碰撞, 有一位高軒半個頭的又學, 經過軒旁邊時撞軒, 點知…撞不動軒而自己跌倒!!!

估不到軒的「件頭」都有番咁上下。

軒今日放學拿了一幅畫回來, 說是視藝堂做完習多時自己畫的。

究竟係軒叻、定係全班都咁快完成?

腳痛

軒今日回來同媽媽講:「我隻腳好痛。」

媽問:「點解呀?」

軒答:「個個班長都病咗無返學, 得我一個攞住簿上二樓教員室(軒班房在一樓), 行咗七、八次呀, 啲簿好重o架。」

他都不是第一次講那些簿好重!

眼利

因為要比賽的關係, 每位小朋友最好有自己的裝備(因為去不同地方比賽, 有時未必可以借到), 爸爸趁着有時間, 用軒上網看款式!

在看手套的時候, 看了幾款, 最後在其中二款做決定。

軒突然問爸爸: 「這個手套手指度有無窿? 」

爸不明：「點解要有窿嘅？」

軒：「用來透氣囉, 另外果款都有。」

最後決定要有窿的一款。

買電腦時已知道他對細節很有要求， 但估不到他這麼看東西時這麼仔細。

專心

冰球練習了很久, 現在終於可以正式比賽! 新一季聯賽即將開始, 軒亦加入了球隊。

但比賽規例一點也不識, 怎辦? 所以今天開始跟Kan Sir學。 見他很留心聽講解, 很用心去練習, 爸爸也很開心。

入泳隊(預備組)

只懂游自由式及背泳的軒, 上次旨在鼓勵他多參與校內活動而幫他報了泳隊選拔試, 今天公布結果-居然入選了!!!!

贏了爸爸

星期天, 上完聖堂, 一起去麥當奴嘆早餐, 軒例牌要豬柳蛋漢堡(近來至愛, 為了它放棄開心樂園餐玩具), 爸爸要豬柳漢堡, 沒有蛋的。

因為隻蛋都幾「濟」, 所以軒食完個飽, 爸叫他不要吃薯餅, 但他不只食薯餅, 還飲了二杯橙汁!!

刺激玩意

幼稚園同學在深灣游艇會開生日會, 邀請了軒軒, 一同慶祝之餘也聚舊一番。

原來裡面有很多歷險玩意, 軒跟朋友仔玩得很開心, 而他亦玩了這個其他人不敢玩的:




這個更刺激, 軒今日沒有玩, 因為八月尾去澳門威尼斯人玩過。

矯型鞋

今日要返屯門醫院檢查對腳, 所以無返學。

醫生睇完軒對腳, 話:「對腳OK喎, 無變差吖。」

媽問:「咁仲要唔要著矯型鞋呀?」

醫生話:「唔洗啦, 掉咗佢啦, 每日企腳踏做運動就得。」

軒聽到之後十分開心, 第一時間拋對矯型鞋落垃圾筒!

八達通表

自從上小學開始, 軒就有帶手表的習慣, 但有的手表都是裝飾的作用多於報時作用, 所以買一隻新的給他。

問他想要什麽手表(預期他會要公仔手表), 他居然答:「八達通表!」

可能是因為學校不準他帶八達通回校, 所以專登要這樣, 作一點反叛!

雖然這樣, 他帶八達通表卻也方便乘車, 所以批準了!

六點起身

今個星期六為長週, 早上八時上課, 軒要好早起身, 所以軒自己校鬧鐘, 六點鐘超身, 以作準備。

因為太早的原故, 爸爸媽媽都未醒, 軒就自己玩玩具、睇書、溫習, 一直都無話要再瞓過。

原以為他下晝返學會好攰, 但問佢又話:「無, 唔攰呀!」

但都係提早送佢上床。

燈籠

中秋節, 小朋友最喜歡玩燈籠。 軒也不例外, 所以買了一個給他, 問他要邊款(以為他會答什麼卡通人物), 點知他說要「大紅燈籠」!

問他點解不要其他款, 他答:「之前响街見過, 覺得靚呀。」

為了買這個燈籠, 還要找好幾家店鋪呢!

盡責

中秋團圓, 大家一起食飯, 妹妹細佬都在。

席間, 妹妹細佬在櫈上跳來跳去, 軒即刻發揮班長本色, 跑去叫佢哋即刻停止, 仲不停「擇名」, 仲擇到一百次!

問軒在班上點樣擇名, 佢話警告三次就擇名, 寫名在黑板上。

爸問:「你記得哂啲名?」 佢同另一個班長每人管四行同學。

軒:「唔記得o架, 問佢哋學號寫低囉!」

泳隊選拔

學校今日舉行泳隊選拔, 軒在不情不願的情況下報了50米自由式。

但軒放學返來話:「爸爸, 你知唔知呀, 我今日游咗100米背泳呀?」

爸:「點解呀, 你淨係報咗自由式喎?」

軒:「老師問我最叻游邊個泳式, 我答背泳, 咁佢咪叫我游囉。

「你知唔知呀, 游水計分o架, 最高分係101分, 我只係得100分咋。」

爸:「咁其他同學幾多分呀?」

軒:「99分、97分咁囉。」

都唔知係咪真!

朋友

早二日問軒同表妹去海洋公園好無, 佢話寧願約幼稚園同學仔, 因為好耐無見。

所以今日專登約去街, 二個小朋友一見面即刻講過不停, 又講玩具又講小學情況, 樣樣都係好特別又新奇!

希望這段友情可以一直維繫吧。

金手指

放學回家, 軒有點兒失望的對媽媽說:「今日唔洗帶班長牌呀!」

媽:「點解呀?」

軒:「老師話下星期一先開始。 但係今日做咗樣好特別嘅嘢, 就係要上二樓電腦室揾哥哥落嚟整電腦。

「仲有呀, 老師行開咗我要企出去唔好俾其他人傾計。」

媽:「咁佢哋聽唔聽你講呀?」

軒:「有啲唔聽啦。」

媽:「咁你點呀?」

軒:「老師返嚟話俾老師聽。」

媽:「你記得哂同學啲名?」

軒:「未啊, 指佢哋出嚟囉!」

講數

一早起身, 吃過早餐, 軒如常地溫習功課, 突然間問媽媽:「我考第一好無呀?」

媽媽聽到佢話要考第一, 當然開心啦, 但原來有條件的。

軒繼續說:「不過考到第一妳要送Super Mario (NDS)俾我喎。」

媽一方面開心佢會定立目標, 但又對這樣的「講條件」有保留, 所以還沒有一口答應。

其實佢幾時學識這樣「講數」的呢?

班長

軒今日拿了個班長牌回來, 說:「老師叫我由聽日開始做班長呀, 仲俾班長牌我!」

爸:「咁你會做幾耐班長呀?」

軒:「唔知呀, 老師話如果我乖就做多幾日喎。」

爸:「係咪輪住做呀?」

軒:「唔知呀, 之前都無人做過, 我係第一個做。

你知唔知呀, 我成日都去校務處o架。」

爸:「點解呀?」

軒:「要幫黃老師攞書去佢張枱!」

爸:「咁黃老師有無攞野呀?」

軒:「無呀, 佢仲响課室教書!」

爸:「得你一個幫手?」

軒:「總共有四個。」

爸:「點解揾你哋?」

軒:「可能我哋乖呢, 一開始就叫我哋, 無揾其他人。」

都係媽媽心水清:「你哋四個係咪最高呀?」

軒:「係呀!」

謎團已經解開。

太緊張

這幾日軒都食好少午餐, 成日都話無胃口, 與之前自己食一碟飯有很大分別。

起初以為早食午餐的關係(未到12點要上校車), 早餐都未消化, 所以吃不下。 但就算提早食早餐及份量少一點, 依然食好少午飯。

軒有帶小食袋回校, 小息時可以吃點小食(小一不可以去食物部), 所以媽準備蛋糕等食物, 等軒肚餓可以食, 但每一天都是原個拿回來, 問他只是答:「唔肚餓。」

因為軒每天都可以好仔細地說出上課的情形及老師的說話, 媽認為是軒太緊張上課, 每分鐘都十分留心, 所以沒有心情食飯。

軒這樣專心當然是好, 希望他儘快適應過來, 回復胃口吧

「豬柳蛋漢堡!」

學校有個好體貼的安排, 就是讓家長可以在小息的時候, 進入學校在「汽水機」同小朋友見面。

在等校車的時候, 軒突然叫媽媽:「小息時妳响汽水機等我, 我想食豬柳蛋漢堡!」

媽媽問:「你見過其他家長帶俾小朋友?」

軒:「未呀, 我想食之麻。」

媽:「今日唔得啦, 聽日先啦。」

唔知佢到幾時會開始「大個仔」, 唔想在學校見到爸爸媽媽呢?

上小學

開學啦!

今天正式上小學, 一早起身吃過早餐, 便收拾好書包, 精精神神迎接未來六年的小學生活。

小學開學禮

華仁小學開學禮, 軒軒第一次正式踏進這家將會渡過六年小學生涯的學校。

這天早上七時半起床, 梳洗後穿著整齊的校服, 便和媽媽出門。 不知道是太早起還是心情緊張, 早餐吃了一口麵包便不吃了!

回到學校, 軒軒便與班主任及同班同學一起參觀校園。

放學後, 軒軒很高興的給媽媽看「貼紙卡」, 說他答對問題, 老師獎了貼紙給他, 共有六張, 是全班最多的。

看來他應該很適應小學生活。

負責任

軒軒一直都好負責任, 係咪自己嘅事都搶住做。

好似今次隻錶無電, 佢自己折開攞粒電出嚟, 自己寫低只有自己睇得明的便條, 然後出行時帶在身, 叫爸爸幫他去買。

買完, 當然係自己換啦！

要求高

屋企之前用部電腦個touchpad係好平滑的, 因為壞咗, 爸爸有時會攞公司部電腦返去用, 依部個touchpad係有凹凸紋的, 軒軒一直用都無話有唔妥。

因為開學, 要去買一部新的在家用。 爸爸臨出門囗, 軒軒居然同爸爸講:「提吓你, 要揀部控制個箭咀果塊嘢要平滑嘅, 唔要凹凹凸凸嘅!」

估唔到細微細眼嘅地方佢都留意到。

玩碼子

晚飯後, 媽媽跟軒準備開學的物品, 剛好有橡皮圈, 媽媽教軒玩一樣兒時玩意-碼子!

剛開始時軒射極都四圍飛, 練習幾次, 慢慢便可以掌握到技巧了。

畢業旅行 - 台灣

放暑假, 朋友仔相約去台灣來個「畢業旅行」!

一連五天的行程, 最好玩的首選BabyBoss, 小小世界及參觀101大廈。

於BabyBoss嘗試不同的職業, 賺取工資, 令軒軒有了初步的「賺錢」概念, 之前問他錢從那裡來, 他都只會答:「銀行攞咪有囉!」 起碼現在知道要付出才有收獲。

又甩牙

甩咗第三隻牙, 都係下面嘅!

堅持己見

畢業聚餐有一個水樽給軒軒作紀念, 因為很有紀念價值(校長提字祝福的), 媽媽不捨得用, 放在一旁準備收好。

今天軒軒要外出, 媽媽着他自己帶水, 軒要用這個紀念水樽, 媽不想, 要求他換另一個, 他不肯, 原因很簡單:「呢個水樽係送俾我, 咁我想用咪用囉!」

斬手指

上完第一堂小DJ, 軒軒同爸爸講:「今日老師問首歌同新聞之間有幾多秒, 得我答啱12秒咋, 其他人都答錯咗。」

爸問:「你係數住定係估o架?」

軒答:「估o架咋!」

爸:「...吓!?」

軒叫爸爸:「下堂我要借你隻手指呀。」

爸:「邊隻呀? 斬開我會好痛喎。」

軒:「唔係呀, memory手指呀, 幫我錄男兒當自強, nobody, 同whale's sneeze落去。」

爸:「哦。」

一放暑假, 暑期活動已經開始! 早上學做小DJ, 下午參觀水警輪。

軒軒睇得好開心, 好投入!

最後一堂課

今日係最後一天在聖保羅堂幼稚園上課, 亦即是最後一天穿上幼稚園的校服!!

雖說是上課, 其實是結業聚餐, 跟以往的校內聚餐一樣, 每位小朋友帶一些食物回去, 與其他人分享。 軒軒今次所揀的, 與以往一樣, 都是最多功夫準備的一種, 今次是壽司!!

因為昨天出外, 沒有時間自己做, 所以只是買回來。 對軒軒來講, 可以跟朋友仔分享, 才是最開心的!

畢業禮

今日係聖保羅堂幼稚園的畢業禮, 軒軒也完成整個幼稚園的生活, 暑假後便進入另一個人生階段!

之前軒也跟爸媽提過, 畢業禮上他班會表演打功夫, 而他會舞龍, 還不只一次提醒爸爸他在那一個位置!

表演當然精彩, 但最感動的是看到他「長大」了!

藥丸

因為皮膚敏感, 手手腳腳都生咗好多粒粒! 媽媽帶軒軒去睇醫生, 醫生話要食抗敏感藥。

一聽到要食藥, 軒軒即刻拍一下醫生隻手, 話:「我唔飲藥水, 食藥丸得啦!」

嚇到醫生都呆一呆

上心

上星期收到小學寄來的信, 要求學生明天到學校注冊。

因為封信收信人係軒軒, 所以給他自己讀。 當他知道要去注冊, 居然十分上心, 回到幼稚園都話哂俾老師聽佢朋天不上課、要去注冊!!

最後, 佢梗係返學啦。

謝師宴

畢業啦, 因為學校沒有舉辦謝師宴, 一班有心嘅家長自行籌備, 在銅鑼灣富豪酒店與校長、各位老師、各位同學一起聚餐, 向校長老師們表達謝意之外, 亦與共學多年的同學仔歡聚一刻, 拍照留念!

在此謹向挍長、師長由衷的道謝, 感激這幾年來耐心的教導。 祝各師長教學安康。

各位同學, 雖然現在要分開, 請大家不要忘記這幾年的一點一滴, 希望大家保持聯絡。

紀念冊

最後二個多星期留在聖保羅堂幼稚園, 雖然還未有不捨得的情緒, 但都要為離開做準備, 第一步當然係與朋友仔保持聯絡, 所以今日都買咗紀念冊, 準備派俾同學仔填。

叫軒軒自然揀, 不出所料, 唔係爆丸就係爆旋陀螺!

又算佢好心機, 自己逐張逐張黐自己名個Label上去, 雖然黐到好醜樣, 總算係自己完成。

畢業禮請柬

今天收到學校請柬, 邀請軒軒出席畢業禮, 才醒覺轉眼間, 軒軒已經幼稚園畢業了!

不知不覺原來已經完成人生的其中一個階段, 現在回頭看, 軒軒在這幼稚園的最後幾個月, 的確「長大」、「成熟」了, 開始少了小朋友的那份稚氣, 多了小學生需要的責任感及自律能力, 希望他可以盡快適應小學生活吧。

問他有否不捨得學校, 他又沒有想象中的大反應, 只有一點點的「不開心」, 原來係因為「我有佢哋電話, 可以成日約出嚟食下午茶!」

紀念冊

就嚟畢業, 越來越多同學仔派紀念冊軒軒填, 今日收五張, 軒軒即刻話:「洗唔洗咁多張呀?」

媽:「人哋想第二時約你出嚟玩啫。」

軒:「咁都唔洗問我一至十最鍾意邊個數字o架! 仲要星座血型o添, 我點知啫!」

咁又真係無聊咗啲喎。

進步

幫軒軒報咗E.nopi學數學, 起初一見到要計咁多數都發哂皮氣, 唔肯做。

咁佢做評估時程度又真係比上咗一年嘅同學仔慢。

課堂上佢會做練習, 老師會改, 做唔哂就攞返屋企做, 第一、二堂只係做咗半本, 仲要有錯, 依家第五、六堂, 居然做咗二本, 雖然都有啲錯, 但都比半本果時少!

佢仲要話：「好簡單之嘛！」

食量驚人

晏晝一家人去飲茶, 點咗十二籠點心, 慢慢歎。

一籠點心有三至四隻, 我哋三個人, 應該有人食多一隻, 估唔到果個人係軒軒! 佢一坐低就話肚餓, 先食咗三個包, 然後每籠點心都食二隻, 夾夾埋埋食得仲多過爸爸媽媽!

依家都食咁多, 發育期點算?

早起

軒軒近來好早起身, 鬧鐘未響已經醒咗。

今日都一樣, 如常起身之後, 自己換校服(校服掛响門頂, 佢應該唔夠高攞!)、刷牙洗面, 居然仲自己準備早餐! 雖然只係牛油麵包, 但自己準備刀、碟、牛油, 仲自己「查」o添! 真係超乖。

所以媽媽俾咗三個印一個貼紙, 以示獎勵。

零用錢

之前間唔中都會俾零用錢軒軒, 令佢有個錢旁身。

依家佢就嚟升小學, 應該係時候有零用錢, 而且學校都教小朋友錢的概念, 所以配合學校, 今日開始會每星期俾零用錢軒軒, 雖然只係每星期$10, 但可以俾佢有管理金錢嘅實際經驗, 希望對佢有幫助。

通利琴行畢業

過埋今日, 軒軒嘅「彈琴日子」正式完結, 因為通利琴行今日舉行畢業禮暨表演會, 接過畢業証書, 正式將差不多三年的學習畫上句號!

佢話上小學要學打鼓！

頭盔

答應軒軒送冰上曲棍球頭盔球做生日禮物, 但西九龍中心間鋪搬咗去Megabo×, 一直都唔得閒去買, 今日去開Megabox綵排通利表演歌曲, 就順道買俾佢。

唔知係咪佢頭大, 好多都嫌細, 最後佢自己揀咗呢個紅色。

生日禮物率之到手!!

長高

軒軒近排比較夜瞓， 但反而高得快， 仲要係好快！

論盡

軒軒一直有聽CD瞓覺嘅習慣, 今晚都一樣, 但佢攞住隻CD又想收埋個盒時, 隻CD跌咗去床邊, 佢問爸爸攞把間尺「了」, 但爸爸只係聽到佢細細聲講:「呀, 跌埋落去tim。」

完成了!

學咗彈琴2年多, 終於嚟到考試。

老實講, 因為大家都唔識, 一直都幫唔到軒軒練習, 只可以「陪」佢練, 但有無彈錯好多時都指導唔到。

考試時好多同學仔都好緊張, 可能無壓力, 軒軒反而彈得幾好, 只係唱音同睇譜有些少錯, 表現可以話係好好! 可能佢知道考完試唔洗再彈琴, 反而更加輕鬆呱!

之後去同學仔生日會, 玩咗個爸爸媽媽都未玩過嘅遊戲:

感動四則

1. 軒軒去玩Ice hockey, 過咗荃灣揾爸爸媽媽。 因為有其他小朋友的關係, 爸爸媽媽由得軒軒同佢哋一齊玩。 期間有一位三歲小朋友想玩Snake and Ladder嘅Board game, 軒軒好有心機教佢點樣擲骰、一步一步行、避開機關, 完全係一個小老師!

2. 小朋友走哂, 都唔洗人叫, 軒軒已經自動自覺收拾小朋友玩完的玩具, 仲要幫手做清潔, 就算叫佢上網玩陣休息都唔肯!

3. 雖然已經食咗麵包做下午茶, 軒軒都肚餓, 但問佢同爸爸食完飯先返去好唔好, 佢答:「有少少肚餓啫, 返去等埋媽媽先食啦 (媽媽去咗探公公)。」

4. 搭地鐵要追車, 大家跑時腳碰腳齊齊跌倒, 軒軒第一個反應係好內咎咁話:「對唔住, 你有無事呀?」 上到車, 軒軒坐低休息, 爸爸幫佢睇吓隻腳, 佢仲好內咎咁問:「係我錯, 係我撞到你, 有無事呀?」 爸爸話:「唔係你錯, 係爸爸撞到你。 隻腳痛唔痛呀?」

佢聽到唔係自己錯, 先至放鬆返, 話「真o架? 有少少痛。

新眼鏡

早二星期同軒軒去理工大學做定期眼睛檢查, 幸好散光度數無加深。

因為用得粗, 對鏡片已經花哂, 加上鏡架都用咗二年, 所以換一幅俾佢, 等佢有新Look上小學!

餃子

學校近幾星期都做有關餃子嘅功課, 除咗搜集資料外, 仲响學校自己包餃子, 可能第一次失敗咗, 上星期連餃子皮點做都要做資料搜集!

今日軒軒打俾爸爸, 話聽日要帶牛油返學校做餃子!!

乜做餃子要用牛油咩?

講大話

軒軒今日做咗一件好令爸爸媽媽傷心嘅事-講大話!

嫲嫲如常接軒軒放學回家, 食完飯做完功課, 嫲嫲話要帶軒軒落北角做少少嘢, 軒軒唔想去, 於是呃嫲嫲話:「媽媽今日好早返, 妳等佢返嚟先去啦。」

嫲嫲信以為真, 一直等, 點知等到九點鍾爸爸媽媽先返, 所以嫲嫲好嬲, 教訓咗軒軒一輪!

爸爸媽媽知道之後都教訓佢, 希望佢以後唔會再犯啦。

小教師

自從爸爸開了公司, 軒軒都好關心, 常常都要去幫手, 有時嫲嫲接完放學送去荃灣, 佢可以話唔肚餓唔洗食飯, 要去到荃灣先。

有時有(唔要嘅)玩具, 都話送俾荃灣。 就好似學校「水果月」用剩貼紙, 都叫爸爸攞返去做獎勵貼紙。

又用佢上其他興趣班的知識, 教爸爸應該點樣去做, 點樣教小朋友, 連幾時邊個小朋友嚟都記得, 真係好熱心!

生性

晚飯時, 媽媽接到婆婆電話, 說公公又再發燒, 剛剛送公公入醫院。

媽媽同軒軒講:「公公入咗醫院, 媽媽好擔心。」

軒軒即刻安慰:「公公係妳爸爸, 係咪? 佢年紀好大啦, 係咪? 佢入咗醫院, 有醫生睇佢, 係咪? 無事嘅, 公公好快就好返o架啦。」

真係生性。

改變主意

學校帶小朋友去參觀超級市場， 每位小朋友要帶$10去買東西， 令小朋友有「金錢」嘅概念， 買嘅嘢係預先同家長商量好的。

軒軒話要買蘋果, 最後買咗....




返到屋企仲好得戚咁同爸爸講：「你睇吓幾抵！」

多謝Ms. Tsang

通利琴行今日係最後一堂, 雖然唔鍾意彈/練琴, 但軒軒好喜歡上Ms. Tsang堂, 畢竟Ms. Tsang由元朗教軒軒教到去銅鑼灣, 又有心機教, 所以軒軒好上堂都好留心。

既然係最後一堂, 軒軒又唔會再升班學落去, 所以買件禮物, 仲親手寫張感謝咭送俾Ms. Tsang, 表達一點謝意。

多謝Ms. Tsang。

愛公公

公公生病了, 軒軒去探公公。

期間公公坐在梳化睡着了, 軒軒看見, 即刻走入房取了張被出來想給公公保暖, 雖然拿了張蓋電子琴用的, 但也見到軒軒幾愛公公。

之後公公要食藥, 軒軒又即刻倒杯暖水出來。

希望公公快啲好返。

自己屋企...元朗

下午, 爸爸同軒軒食tea, 期間有地產打比爸爸, 問元朗間屋會唔會賣, 傾咗一陣間。

收線後, 軒軒問邊個打嚟(例牌動作, 如果俾佢見到來電係佢識嘅人, 佢會搶嚟聽o添), 爸爸如實話比佢知:「有個地產經紀問會唔會賣元朗間屋。」

佢聽到即刻笑哂出嚟、好得戚咁話:「梗係唔賣啦, 自己屋企、要返嚟住o架。」

.................................

夜晚食飯, 軒軒咬住對筷子, 點知一縮, 上下牙齒好大力咁撞o埋一齊, 喊得好犀利, 再食嘢時, 軒軒話:「隻牙好似鬆鬆哋!」

原來撞到上面隻門牙鬆咗, 仲有血絲o係! 好彩唔係下面鬆, 下面換咗牙啦, 上面未。

軒軒 the builder

高街想多啲地方用，所以開什物房，趁住假期有時間，自己動手油牆身，咁好玩，邊少得軒軒一份呀！

愉景灣掘蛋

愉景灣每年復活節都有個掘蛋比賽，又有攤位遊戲玩，成個嘉年華會一樣，好有氣氛。

上年軒軒都有參加，因為年齡組別關係，有媽媽一齊幫手掘，但今年就要軒軒自己去，原先諗住佢只係會行行企企，唔會認真掘，諗住佢好似上年有五隻蛋已經好開心，殊不知有成十七隻，真係犀利！

玩攤位遊戲亦好投入，睇佢玩「水泡相撲」個表情就知玩得好開心!






不過天氣突然轉變，大風又大雨，最後成家人都病咗!

生日快樂

今日係媽媽生日, 雖然無買生日禮物, 但都親手畫咗張「生日畫」俾媽媽。



夜晚去Fat Angelo's慶祝!

媽媽, 生日快樂!

學以致用

媽媽之前教軒軒點樣用手檢查有無發燒, 先摸額頭、再摸手心、後頸, 再話俾佢聽點樣先係發燒。

軒軒即刻學以致用, 第二朝爸爸仲瞓緊, 佢同爸爸講:「你好攰呀? 係咪發燒呀? 我幫你摸吓......額頭唔熱, 手唔熱,擰轉俾我摸吓條頸啦......條頸都無事。 你無發燒呀, 快啲起身啦。」

好sweet.....加大版

軒軒話咁細個心唔足以代表對爸媽嘅愛， 所以改咗幅畫：

好sweet

軒軒寫來送給爸爸媽媽的。

通告

學校今日「派」通告回來, 希望小朋友後天帶一些關於「餃子」的資料回校, 特別的是那張通告是軒軒自己寫的!

爸爸問他:「你自己話要帶餃子的資料嗎?」

軒答:「唔係, 係全班投票o架!」

爸問:「咁你投咩呀?」

軒答:「餃子囉。」

激死!

愛麗絲夢遊仙境

近幾星期軒軒非常喜歡「Alice in the Wonderland (愛麗絲夢遊仙境)」本書, 每晚瞓覺都要媽媽讀俾佢聽, 仲要聽完又聽, 無話

咁啱戲院有呢套戲上, 軒軒梗要去睇, 但套戲係3D版本, 要帶3D眼鏡睇, 即刻有少少抗拒, 但最後都敵唔過套戲, 帶住睇足全程, 非常投入。

燦爛笑容

每朝早上校車, 軒軒會坐好, 自己縛安全帶, 不過無論縛好未, 只要校車一開, 佢都會望住窗外嘅爸爸媽媽揮手, 仲要笑得好燦爛、揮到見唔到為止!

佢呢個笑容係最靚嘅。

禮賓府

禮賓府一年一度開放給公眾參觀, 以前係晚上睇新聞先知佢開, 咁難得今年知道, 就約o埋公公婆婆、舅父及姨媽一齊去行吓。

挪亞方舟

第一次去挪亞方舟係跟學校旅行去的。

好好玩, 不過唔夠時間。

慶祝生日

今年生日無特別慶祝, 只係同屋企人開開心心食飯。

星期日同爺爺嫲嫲食飯, 今日正日就去揾公公婆婆。

婆婆煮咗好好味嘅餸, 多謝婆婆!

生日Party

最後一次返元朗屋企, 軒軒無話唔開心, 可能已經明白咗。

晚上同雍韋細佬一齊慶祝生日, 去咗尖沙嘴Charlie Brown Cafe食飯, 個生日蛋糕好好味!

正式離開

今日正式搬離元朗。

軒軒好乖, 全程都好努力幫手作最後的收拾, 亦都無再表現得情緒低落, 但我知道他是不捨得的

不捨得......元朗

今夜是暫別元朗前的最後一晚, 家裡的東西已收拾得七七八八, 一箱一袋的放滿全屋。

軒軒一直都很主動幫助收拾, 自己的書本玩具都是親手挑選, 看看那些是要的、那些是不要, 就算是爸爸媽媽的都會搶着幫手。

但眼看着自己的東西從房間消失, 由出生開始便熟悉的地方、長大的地方變了另一個模樣, 還得給別人入住, 不能回來! 軒軒哭了, 很落寞, 沒有表情, 眼淚無聲的落下, 整個人伏在爸爸身上, 不能自己。

其實我就算想不到也應該留意得到, 軒軒不只一次說過話喜歡元朗多一些, 老友記也在元朗, 始終這是他成長的地方, 留戀也是正常。

爸爸答應你, 會盡量多帶你回來見朋友仔, 亦會盡快把家收回來給你!

再....放煙花

跟往年一樣, 過年時去澳門行吓, 亦再放吓煙花。

軒軒今年大膽好多, 亦都玩到唔拾得走!

玩到真係好攰, 坐船返香港時瞓得好冧。

難得心頭好

過年前, 同軒軒去行年宵花市, 佢想買風車, 但未揾到風車見到把吹氣嘅刀又話要!

爸爸同軒軒講:「只係買一樣嘢, 你自己決定買邊樣啦。」

決定買......刀!

繼續行終於見到風車。見到心頭好梗要買, 爸爸答應軒軒買埋風車。

軒軒揀好一款, 問姐姐:「幾錢呀?」

賣風車的姐姐笞:「$25啦。」

軒軒想話好之際, 爸爸响佢耳邊話:「$20得啦。」 軒軒就跟住爸爸咁同姐姐講。」

姐姐笑到唔停到口:「嘩, 識講價喎。 $23啦。」

正當爸爸想再叫軒軒講價, 佢已經响個八達通袋度攞錢(軒軒裝八達通個袋裡面有些零用錢, 俾佢儲零用錢之外, 亦以備不時之需), 一臉無奈地說:「唉, 等我睇吓有無啦。」

見佢咁無奈, 爸爸即刻幫手。 最後$22買咗。

購物消閑在學校

新年前最後一日上學， 聖保羅堂幼稚園舉行新年派對， 佈置到好似年宵市塲咁， 一個個攤位有得食有得「買」。

學校又做得好好， 每位小朋友有一張購物卷， 可以在攤位自由選擇購置五樣食物、三樣禮物, 令小朋友學習消費， 又玩得開心。

軒軒最後「買」了：

夠義氣

同學仔蔡炫曄响海洋公園開生日Party, 一齊嘅梗有成班聖保羅堂朋友仔啦。

中途佢哋玩超人遊戲, 分開二組人, 攞住氣球做嘅槍互射。 軒軒話江正平係佢最好嘅朋友, 果然有佢嘅道理。

話說中途有小朋友同軒軒「鬧交」 (小朋友玩吓啫), 江正平即刻挺身出嚟撑軒軒, 仲話會共同進退o添!

認真訓練

軒軒想玩冰球， 爸爸同佢講練習會好辛苦，問佢會唔會俾心機練習， 如果唔會就玩得唔叻， 咁不如唔好玩， 佢好認真咁答：「梗係會啦， 唔會半途而廢嘅。」

又吓點！

再上校園廣播站

上星期羅老師派了表格給小朋友， 看看有誰想在今天的校園廣播站分享， 晨軒說想彈首歌， 於是便寫上歌名交回學校， 想不到真的選了他作分享。

整個星期軒軒都很努力練琴， 終於今天在全校面前漂亮地表演出來(他自己說的)。

多謝陳老師幫忙拍照。

鎖匙人...怪獸

因為爸爸媽媽工作嘅關係，需要配一條屋企鎖匙俾軒軒。

帶軒軒去配匙時，配匙姨姨問軒軒：「條鎖匙係咪配俾你？」

軒軒答：「係呀。」

姨姨：「好嘢喎，做咗鎖匙人(keyman) 喎。」

返到屋企，軒軒同爸爸講：「果姨姨好無禮貌，話人哋做鎖匙人呀。」

原來佢以為「鎖匙人」係超人入面果啲怪獸，所以好唔鍾意。

養狗仔

軒軒由細到大都好鍾意小狗, 一歲多响屋園見到狗仔都追住嚟玩, 入到寵物店更加唔願走!

今日佢突然同媽媽講:「我升小學想養隻狗仔!」

媽媽估唔到佢突然間有咁嘅要求，唔係好識反應，不過都無即刻拒絕，只係解釋養狗會有嘅責任俾軒軒聽，等佢有心理準備。

好乖

軒軒噚晚好夜先瞓, 朝早已經唔願起身, 放學返嚟功課梗係唔想做。 食完飯媽媽俾佢瞓一陣。

個多小時之後, 軒軒醒咗, 媽媽繼續瞓。

軒軒問媽媽:「可唔可以出去玩一陣?」

媽媽話:「好, 玩一陣就自己去做功課啦。」

應承咗之後, 軒軒就自己去玩。 估唔到玩咗半個鐘之後, 居然會自動自覺收拾玩具, 攞功課出嚟做!

新活動

噚日摘完Strawberry, 今日就開始學Ice Hockey!

因為對鞋唔同咗(鞋底把刀無啞, 溜得快啲), 一開始要扶住雪糕筒練習, 但唔洗十分鐘就攞住支球棍射門!

見到軒軒論論盡盡但又有板有眼, 真係幾得意。 佢都係鍾意速度感, 一放底支球棍就放跑, 响人叢中左穿右插!

教練話每個教練都有一隊球隊, 球員學到咁上下就會入隊參加比賽! 真係希望軒軒可以快啲比賽。

摘士多啤梨

新嘅一年, 自然有新願望! 希望嚟緊一年事事順利, 一家人快快樂樂!

新一年梗要有新攪作, 今日就同朋友仔去錦田摘Strawberry!

食過早餐, 搭西鐵再轉的士, 唔洗十五分鐘就到! 田裡面啲Strawberry真係好多同好大粒, 食落都好清甜, 睇吓摘咗幾多!

BBQ之後唔少得嘅梗係活動時間啦。

朋友仔响附近有田種菜, 佢仲俾咗啲軒軒食, 原先見啲有機菜咁靚, 燒啲肉做生菜包, 但菜真係好清甜, 軒軒攞住啲新鮮「生菜」係咁食, 仲話唔夠o添!